Ադրբեջանն Իսրայելի միջոցով փորձում է հավասարակշռել ԱԲ ոլորտում Հայաստան-ԱՄՆ համագործակցությունը։ Այդ մասին գրառում է արել տարածաշրջանի հարցերով փորձագետ Արմեն Պետրոսյանը։
Գրառումը ստորև՝
Անգամ Ադրբեջան-Հայաստան խաղաղության ամրագրման դեպքում Բաքվի ռազմավարական նպատակն է լինելու Հարավային Կովկասում բոլոր հնարավոր մակարդակներում առաջատար դերակատարը լինելը։ Դա վերաբերում է ոչ միայն ռազմաքաղաքական, էներգետիկ, տրանսպորտային ոլորտներին, այլ այն ուղղություններին, որոնք կարող են զարգանալ նոր տեխնոլոգիական համագործակցությունների արդյունքում։
Այս տեսանկյունից արդի աշխարհի, նաև մեր տարածաշրջանի համար ամենահեռանկարային ոլորտն ԱԲ-ի և առնչակից տեխնոլոգիաների ուղղությունն է, որտեղ Հայաստանը ներկայում շոշափելի առավելություններ ունի մյուս հարևանների նկատմամբ։ Նշված տեսլականը խորացնելու գերազանց հնարավորություն է 2025 թ. օգոստոսի 8-ին Վաշինգտոնում ՀՀ և ԱՄՆ միջև ստորագրված ԱԲ և կիսահաղորդիչների ոլորտում համագործակցությունը զարգացնելու վերաբերյալ հուշագիրը և դրան հաջորդած զարգացումները։
Մինչդեռ Ադրբեջանն Ադրբեջան չէր լինի, եթե չփորձեր հավասարակշռել այս ոլորտում իր հնարավորությունները։
Այդ համատեքստում փետրվարի 3-ին Երուսաղեմում Իսրայելի արհեստական բանականության գծով ազգային վարչության ղեկավար Էրեզ Ասկալը և Ադրբեջանի թվային զարգացման և տրանսպորտի նախարար Ռաշադ Նաբիևն արհեստական բանականության ոլորտում փոխըմբռնման հուշագիր են ստորագրել։ Արարողությանը մասնակցել է նաև Իսրայելի վարչապետ Բենիամին Նեթանյահուն։
Բաքվի և Թել Ավիվի միջև նաև ԱԲ ոլորտում համագործակցության խորացման հնարավորությունը այդ երկրների միջև ռազմատեխնիկական բանագավառում արդենիսկ հաջողված ձեռքբերումների փորձով, այնուամենայնիվ, նաև բավականաչափ կարևոր աշխարհաքաղաքական բաղադրիչ ունի՝ հատկապես տարածաշրջանում եղած անորոշությունների ֆոնին։ Եվ այս հարցում ուշագրավ կլինի հետևել Թեհրանի, Անկարայի, ինչու ոչ նաև Մոսկվայի մանևրներին՝ իհարկե յուրաքանչյուրի դեպքում սեփական առաջնահերթությունների համատեքստում։
Հետևեք մեզ տելեգրամում
