ՀՀ տարածքային կառավարման և ենթակառուցվածքների նախարար Դավիթ Խուդաթյանը փետրվարի 10-ին ընդունել է Հայաստանում Միացյալ Թագավորության արտակարգ և լիազոր դեսպան Ալեքսանդրա Քոուլին։ Այդ մասին տեղեկանում ենք նախարարի Ֆեյսբուքի էջից:
«Ողջունել եմ դեսպանին և կարևորել Հայաստանի և Միացյալ Թագավորության միջև հարաբերությունների շարունակական զարգացումը։
Դեսպանն իր հերթին ընդգծել է՝ Հայաստան-Միացյալ Թագավորություն հարաբերությունները ռազմավարական գործընկերության մակարդակում են։ Հանդիպման ժամանակ քննարկել ենք ենթակառուցվածքային ծրագրեր։
Դեսպանին տեղեկացրել եմ, որ ՏԿԵ նախարարությունը խոշոր ենթակառուցվածքային ծրագիր է իրականացնում, և շատ ցանկալի կլինի այդ ծրագրերում, միջազգային մրցույթներում տեսնել ՄԹ ընկերությունների։
Անդրադարձ ենք կատարել նաև «Խաղաղության Խաչմերուկ» նախաձեռնությանը։
Երկուստեք կարևորել ենք հունիս ամսից Երևան-Լոնդոն ուղիղ չվերթերի մեկնարկը, որը հնարավորություն կտա էլ ավելի զարգացնել երկու երկրների հարաբերություններն ինչպես առևտրատնտեսական, այնպես էլ զբոսաշրջության ուղղությամբ»,- նշված է գրառման մեջ։
Հետևեք մեզ տելեգրամում
