Շուտով «Turkish Airlines»-ն է գալիս ՀՀ, որը Երևանից դեպի Լոս Անջելես թռիչքի համար մեծ ներուժ ունի: Այս մասին մամլո ասուլիսի ժամանակ ասել է Զբոսաշրջության կոմիտեի նախագահ Լուսինե Գևորգյանը:
«Ինձ միշտ հարցնում են Երևան-Լոս Անջելես ուղիղ չվերթի մասին, իսկ իրենք իրականացնում են այդպիսի չվերթ ու ունեն այդ ներուժը: Դեռ չեմ կարող ասել, թե իրենք ինչպես կվարվեն, բայց աշխարհում երրորդ հզորագույն ավիաընկերություններից մեկն են, ու կարող են Երևան-Լոս Անջելես ուղիղ չվերթի հնարավորություն ստեղծել: Սա մեր նոր բանակցվող ուղղություններից մեկն է, չեմ կարող ասել, երբ կլինի, բայց մեր ուշադրության կենտրոնում է գտնվում»,- նշել է նա:
Անդրադառնալով ուղիղ չվերթներին՝ Լուսինե Գևորգյանը նշեց, որ բանակցվում է նաև Չինաստանի հետ ուղիղ ավիափոխադրումը, նախորդ տարի Չինաստանից եկող զբոսաշրջիկների թիվը ևս աճել է:
Հավելեց, որ նկատվում է ցամաքային անցակետերով՝ Վրաստանից դեպի Հայաստան եկող չինացիների մուտք, ու եթե ունենանք ուղիղ չվերթ՝ Երևանից դեպի Չինաստանի այլ քաղաքներ, կարող ենք Վրաստանի հետ համատեղ տարածաշրջանային նոր տուրեր անել, ինչը Վրաստանը հաջողությամբ անում է Ադրբեջանի հետ:
Նշենք, որ Մայիսից կսկսվեն Երևան-Ռիգա ուղիղ չվերթները, հունիսից՝ Երևան-Լոնդոն-Երևան: Դեպի Լոնդոն չվերթին ընդառաջ իրականացվելու է մեծ մարկետինգային արշավ:
Հետևեք մեզ տելեգրամում
