Իրանի ԱԳՆ խոսնակ Էսմայիլ Բաղաեին, անդրադառնալով կարճաժամկետ հրադադարի վերաբերյալ շրջանառվող լուրերին, հայտարարել է, որ Թեհրանը մերժում է այն, քանի որ նման դադարները հաճախ ծառայում են հակառակորդի ուժերի վերախմբավորմանը: Փոխանցում է իրանական Tasnim լրատվական գործակալությունը:
Նախարարության ներկայացուցիչը շեշտել է, որ անհրաժեշտ են հստակ երաշխիքներ, որոնք կբացառեն հետագա ագրեսիան։
Այս հայտարարությունը հնչում է այն տեղեկությունների ֆոնին, ըստ որոնց՝ միջնորդ երկրները փորձում են հասնել 45-օրյա ժամանակավոր հրադադարի։ Իրանական մամուլը նման նախաձեռնությունները դիտարկում է որպես հոգեբանական ճնշման փորձ և ռազմավարական թակարդ: Ընդգծվում է, որ Թեհրանը չի համաձայնի այնպիսի պայմանների, որոնք պահպանում են պատերազմի վտանգը և հակառակորդին թույլ են տալիս վերականգնել ռազմական ներուժը։
Ըստ իրանական կողմի՝ պատերազմը կարող է ավարտվել միայն Թեհրանի պայմանների բավարարման դեպքում, որոնցից մեկը հետագա հարձակումների բացառման երաշխիքն է։ Միևնույն ժամանակ ընդգծվում է, որ տարածաշրջանում, մասնավորապես Հորմուզի նեղուցում, իրավիճակը չի վերադառնալու նախկին կարգավիճակին, և ձևավորվելու է անվտանգային նոր իրողություն։
Հետևեք մեզ տելեգրամում
