Բողոքի ցույցերից հետո Էրդողանը որոշել է վերաբացել Ստամբուլի հեղինակավոր համալսարանը

Թուրքիայի նախագահ Ռեջեփ Թայիփ Էրդողանը հրամանագիր է ստորագրել Ստամբուլի Բիլգի համալսարանի վերաբացման մասին, հայտնել են թուրքական ԶԼՄ-ները։

Վերջին հրամանագիրը չեղյալ է հայտարարել մայիսի 22-ին հրապարակվածը։ «Բարձրագույն կրթության խորհրդի նախագահության նամակի համաձայն՝ որոշում է կայացվել չեղյալ հայտարարել Ստամբուլի Բիլգի համալսարանի գործունեության լիցենզիան չեղյալ համարելու վերաբերյալ նախագահի 2026 թվականի մայիսի 21-ի թիվ 11384 որոշումը, որի համար հիմնադիր հիմնադրամում նշանակվել էր հոգաբարձու՝ համաձայն «Բարձրագույն կրթության մասին» թիվ 2547 օրենքի լրացուցիչ 11-րդ հոդվածի»,- ասվել է նոր հրամանագրում։

Փակման որոշումը բողոքի ալիք էր բարձրացրել ուսանողների շրջանում, որոնք վերջին երեք օրերի ընթացքում հրաժարվում էին լքել համալսարանական տարածքը: Նախօրեին ոստիկանությունը բողոքի ակցիային արձագանքել էր արցունքաբեր գազով և ռետինե փամփուշտներով՝ ձերբակալելով մի քանի ուսանողների: Տասնյակ ուսանողներ զբաղեցրել էին համալսարանի շենքը, սակայն ոստիկանությունը հեռացրել էր նրանց։

Համալսարանի հիմնադրամը կառավարվում էր հոգաբարձուի կողմից սեպտեմբերից՝ «Can Holding»-ի առգրավումից հետո, որը տեղի էր ունեցել Խնայողական ավանդների ապահովագրության հիմնադրամի կողմից՝ փողերի լվացման լայնածավալ հետաքննության շրջանակում։

Հիշեցնենք, որ մայիսի 22-ին Էրդողանը հրամանագիր էր ստորագրել Թուրքիայի ամենահեղինակավոր համալսարաններից Բիլգի համալսարանը փակելու վերաբերյալ։