Իսրայելը քննարկում է Հարավային Լիբանանում զբաղեցրած որոշ տարածքներից զորքերի «խորհրդանշական» հետքաշման հավանականությունը՝ Լիբանանի հետ առաջիկա բանակցությունների շրջանակում։ Այս մասին հայտնել է «CNN»-ը։
Աղբյուրի փոխանցմամբ՝ նախաձեռնությունը քննարկվել է Իսրայելի և Լիբանանի միջև Վաշինգտոնում նախատեսված եռօրյա բանակցություններից առաջ, որոնք անցկացվելու են ԱՄՆ նախագահ Դոնալդ Թրամփի վարչակազմի հովանու ներքո։
Հնարավոր հետքաշումը կարող է վերաբերել այսպես կոչված «Դեղին գծից» այն կողմ գտնվող մի շարք փոքր հատվածների։ «Դեղին գիծը» սահմանազատում է այն տարածքները, որոնք իսրայելական բանակի վերահսկողության տակ էին մնացել նախորդ հրադադարից հետո։
«CNN»-ի զրուցակիցը նշել է, որ Իսրայելը սահմանափակ հետքաշումը դիտարկում է որպես «բարի կամքի դրսևորում» Լիբանանի կառավարության նկատմամբ՝ նպատակ ունենալով առաջնահերթություն տալ դիվանագիտական գործընթացին և լիբանանյան ուղղությունը տարանջատել ԱՄՆ-Իրան հրադադարի շուրջ բանակցություններից։
Միևնույն ժամանակ, Իսրայելի պաշտպանության նախարար Իսրայել Կացը կիրակի օրը հերքել է տեղեկությունները, թե իսրայելական բանակը կարող է դուրս գալ Բոֆորի ամրոցի շրջանից, որտեղ վերջին օրերին գրանցվել են ամենաթեժ բախումները։ Կացը և վարչապետ Բենիամին Նեթանյահուն բազմիցս հայտարարել են, որ Իսրայելը չի պատրաստվում լքել այն տարածքները, որոնք Թել Ավիվը համարում է անվտանգության գոտի Հարավային Լիբանանում։
Կիրակի օրը Հարավային Լիբանան են այցելել նաև Իսրայելի պաշտպանության բանակի գլխավոր շտաբի պետ, գեներալ-լեյտենանտ Էյալ Զամիրը և Լիբանանի զինված ուժերի հրամանատար, գեներալ Ռուդոլֆ Հայկալը։
Հետևեք մեզ տելեգրամում
