Իսրայելի արտաքին գործերի նախարար Գիդեոն Սաարը հայտարարել է, որ Իսրայելի և Լիբանանի միջև բանակցությունների հաջորդ փուլը կանցկացվի Իտալիայի մայրաքաղաք Հռոմում։ Այս մասին հայտնում է «Arab News»-ը։
Երուսաղեմում Գերմանիայի արտաքին գործերի նախարար Յոհան Վադեֆուլի հետ համատեղ մամուլի ասուլիսի ընթացքում Սաարը նշել է, որ Իսրայելը, Լիբանանը և Միացյալ Նահանգները շուրջ երկու շաբաթ առաջ ԱՄՆ-ի աջակցությամբ հասել են «պատմական շրջանակային համաձայնագրի», և այժմ բանակցությունները շարունակվելու են դրա հիման վրա։
Սաարը նաև ընդգծել է, թե Իսրայելը տարածքային հավակնություններ չունի Լիբանանի նկատմամբ՝ նշելով, որ բանակցությունների նպատակն է առաջ մղել ձեռք բերված համաձայնության իրականացումը։
Հիշեցնենք, որ Իսրայելը, Լիբանանը և Միացյալ Նահանգները հունիսի 26-ին Վաշինգտոնում ստորագրել են եռակողմ շրջանակային համաձայնագիր, որը նախատեսում է Իսրայելի և լիբանանյան «Հեզբոլլահ» շարժման միջև ռազմական գործողությունների փուլային դադարեցում։ Համաձայն փաստաթղթի՝ իսրայելական զորքերը ժամանակավորապես կշարունակեն մնալ Լիբանանի հարավում գտնվող, այսպես կոչված, «անվտանգության գոտում»՝ մինչև «Հեզբոլլահ»-ի լիարժեք զինաթափումը։ Միաժամանակ Լիբանանի զինված ուժերը պետք է աստիճանաբար վերահսկողություն հաստատեն երկրի ամբողջ տարածքի նկատմամբ և զինաթափեն բոլոր ոչ պետական զինված խմբավորումներին։
Հետևեք մեզ տելեգրամում
