ԱՄՆ-ն և Իրանը կրկին փոխադարձ հարվածներ են հասցրել: ԱՄՆ Կենտրոնական հրամանատարությունը (CENTCOM) հայտարարել է, որ հարձակման ընթացքում թիրախավորել է ավելի քան 80 օբյեկտ: Ըստ ամերիկյան կողմի՝ գործողությունն իրականացվել է ի պատասխան Հորմուզի նեղուցում առևտրային նավերի դեմ Թեհրանի իրականացրած հարձակումների:
«ԱՄՆ ուժերը հարվածներ են հասցրել իրանական ՀՕՊ համակարգերին, հրամանատարական և կառավարման ցանցերին, ափամերձ ռադարային կայաններին, հականավային հրթիռային համակարգերին, ինչպես նաև Իսլամական հեղափոխության պահապանների կորպուսի ավելի քան 60 մոտորանավակների՝ նեղուցում և դրա մատույցներում։ Նպատակն է նվազեցնել Իրանի կարողությունը՝ շարունակելու հարձակումները միջազգային առևտրային միջանցքով անցնող նավերի վրա», – նշվել է CENTCOM-ի պաշտոնական հայտարարության մեջ:
ԻՀՊԿ տարածած պաշտոնական հաղորդագրության համաձայն՝ ամերիկյան կողմի հարձակման թիրախում են հայտնվել Հորմոզգան նահանգի և Մահշահրի (Խուզեսթան նահանգ) ափամերձ մի քանի ռազմաբազաներ ու քաղաքացիական օբյեկտներ:
«Ի պատասխան այս ագրեսիայի՝ Իսլամական հեղափոխության պահապանների կորպուսի ռազմածովային և օդատիեզերական ուժերը՝ հրթիռային և անօդաչու թռչող սարքերի համատեղ գործողության ընթացքում, հարվածներ են հասցրել Սալման նավահանգստում, Բահրեյնի 5-րդ ռազմածովային շրջանում և Քուվեյթի «Ալ-Սալեմ» ավիաբազայում գտնվող ԱՄՆ կարևորագույն ռազմական օբյեկտների 85 կետերի»,- հայտարարել է ԻՀՊԿ-ն։
Կորպուսը նաև հայտնել է, որ գործողության ընթացքում խոցել է ամերիկյան MQ-9 Reaper հարվածային անօդաչու թռչող սարք:
Հետևեք մեզ տելեգրամում
