Հայաստանն ու Ադրբեջանը սահմանազատել են պետական սահմանի շուրջ 13 կիլոմետր հատված։ Այս մասին լրագրողների հետ զրույցում հայտարարել է Ադրբեջանի արտաքին գործերի նախարար Ջեյհուն Բայրամովը։
«Սահմանազատման և սահմանագծման գործընթացը շարունակվում է։ Այդ նպատակով երկու երկրների կողմից ստեղծվել են հատուկ հանձնաժողովներ, որոնք գլխավորում են փոխվարչապետերը։ Կատարված աշխատանքից արդեն իսկ կան առաջին դրական արդյունքները։ Վերջին տարիներին սահմանազատվել է պետական սահմանի շուրջ 13 կիլոմետր հատված»,- նշել է Ադրբեջանի ԱԳ նախարարը։
Բացի այդ, ըստ նրա, Ադրբեջանն ու Հայաստանը համաձայնեցված կարգով ընդունել և երկու երկրներում հաստատել են մի շարք նորմատիվ իրավական ակտեր, որոնք կարգավորում են հանձնաժողովների գործունեությունն ու սահմանում նրանց հետագա աշխատանքը։
Բայրամովը նաև հայտնել է, որ Բաքուն և Երևանը պայմանավորվածություն են ձեռք բերել սահմանազատման գործընթացը շարունակել հյուսիսից հարավ ուղղությամբ՝ սկսած Վրաստանի հետ սահմանի հատման կետից մինչև Իրանի Իսլամական Հանրապետության սահման։ Ադրբեջանի արտաքին քաղաքական գերատեսչության ղեկավարն ընդգծել է, որ «այս գործընթացի շրջանակներում կարգավորվելու են նաև անկլավային/էքսկլավային գյուղերին առնչվող հարցերը»։
Հետևեք մեզ տելեգրամում
