Հուլիսի 29-ին Իսրայելի վարչապետ Բենիամին Նեթանյահուն Սպիտակ տանը հանդիպել է ԱՄՆ նախագահ Դոնալդ Թրամփի հետ: 90 րոպեանոց զրույցի հիմնական թեման եղել է Իրանը: Այս մասին հայտնում է Axios-ը։
Լրատվամիջոցը, հղում անելով իսրայելցի պաշտոնյայի, հայտնում է, որ հանդիպմանը քննարկվել են Իրանի դեմ հետագա գործողությունների երեք հիմնական տարբերակները: Դրանք են՝ Իրանի հետ համաձայնագրի կնքումը, ծովային շրջափակման շարունակումն ու տնտեսական ճնշման ավելացումը, ինչպես նաև ռազմական հարվածների վերսկսումն ու ինտենսիվացումը: Իսրայելի վարչապետը Թրամփին հայտնել է, որ թերահավատորեն է վերաբերվում Թեհրանի հետ որևէ համաձայնության հասնելու հեռանկարին։
Ըստ աղբյուրի՝ Թրամփը մտահոգություն է հայտնել էներգետիկ շուկաների և գլոբալ տնտեսության վրա պատերազմի ազդեցության վերաբերյալ ։ Նեթանյահուն պատասխանել է, որ Իրանն օգտագործում է իր միակ լծակը՝ Հորմուզի նեղուցը, որպեսզի ԱՄՆ-ից զիջումներ կորզի: Իսրայելի վարչապետը հավելել է, որ Թեհրանի տնտեսության վրա ճնշումն ավելացնելու այլ եղանակներ ևս կան, քանի որ երկրում արդեն նկատվում են վառելիքի պակաս, հերթեր լիցքավորման կայաններում և բնակչության դժգոհություն:
Հանդիպման ընթացքում Նեթանյահուն Թրամփին է ներկայացրել Սիրիայի քարտեզը՝ ցույց տալով, որ Թուրքիայի վերահսկողության տակ գտնվող տարածքները բազմակի անգամ գերազանցում են Իսրայելի վերահսկած տարածքներին: Վարչապետը պարզաբանել է, որ իսրայելական զորքերը կմնան Սիրիայի հարավում գտնվող բուֆերային գոտում այնքան ժամանակ, քանի դեռ պահպանվում է ջիհադական խմբավորումների սպառնալիքը:
Բացի այդ, Նեթանյահուն հայտարարել է, որ լրջորեն մտադիր է առաջիկա 10 տարում ԱՄՆ-ի կողմից Իսրայելին տրամադրվող ուղղակի ռազմական օգնությունը հասցնել զրոյի՝ ձգտելով հասնել պաշտպանական լիակատար ինքնուրույնության: Նա իսրայելական ռազմարդյունաբերական ընկերություններին հանձնարարել է մեկ տասնամյակի ընթացքում մշակել սեփական ժամանակակից կործանիչը, որպեսզի երկրի ՌՕՈւ-ն պահպանի հզորությունը անգամ F-35-ների մատակարարման հնարավոր դադարեցման դեպքում:
Հետևեք մեզ տելեգրամում
