ԱՄՆ Սենատում հուլիսի 29-ին Ռուսաստանի և Իրանի նկատմամբ պատժամիջոցների խստացման վերաբերյալ օրինագիծն ընթացակարգային երկրորդ քվեարկությունն է անցել: Փաստաթղթի շուրջ քննարկումներ սկսելուն կողմ է քվեարկել 84, դեմ՝ 12 սենատոր: Սա նշանակում է, որ նախագծի շուրջ աշխատանքները կշարունակվեն, իսկ ավելի ուշ տեղի կունենա վերջնական քվեարկությունը։
Punchbowl News պարբերականի փոխանցմամբ՝ Սենատում մեծամասնություն կազմող հանրապետականները նախատեսում են վերջնական քվեարկությունն անցկացնել մինչև շաբաթվա վերջ: Օրինագծի հիմնական հեղինակն էր հուլիսի 11-ին մահացած սենատոր Լինդսի Գրեհեմը: Փաստաթղթի նոր տարբերակով նախատեսվում է պատժամիջոցներ սահմանել Ռուսաստանի բարձրագույն քաղաքական ու ռազմական ղեկավարության, պետական ընկերությունների, ինչպես նաև այն օտարերկրյա ձեռնարկությունների նկատմամբ, որոնք աջակցում են ՌԴ ռազմարդյունաբերական համալիրին: Սահմանափակումներ են նախատեսվում նաև ՌԴ Կենտրոնական բանկի, «Սբերբանկի», «Գազպրոմբանկի», էներգետիկ խոշոր նախագծերի, այդ թվում՝ «Յամալ ՍՊԳ»-ի, «Արկտիկ ՍՊԳ»-ի նկատմամբ:
Նախկինում առաջարկված 500-տոկոսանոց մաքսատուրքերի փոխարեն այժմ նախատեսվում է 100-տոկոսանոց սակագներ կիրառել ռուսական նավթի ու գազի հինգ խոշորագույն գնորդների, ինչպես նաև այն հինգ երկրների նկատմամբ, որոնք օգնում են Մոսկվային շրջանցել արևմտյան պատժամիջոցները: Փաստաթղթով խստացվում են նաև Իրանի դեմ սահմանված ճնշումները:
ԱՄՆ նախագահ Դոնալդ Թրամփը հուլիսի 29-ին աջակցություն է հայտնել Սենատի մշակած նախագծին, սակայն նշել է, որ Ներկայացուցիչների պալատի արձակուրդը վաղաժամկետ ընդհատելու և օրինագիծն անհապաղ քննարկելու անհրաժեշտություն դեռևս չկա:
Հետևեք մեզ տելեգրամում
