Հորդանանը հայտարարել է, որ Երուսաղեմի Ալ-Աքսա մզկիթի և դրա հարակից տարածքի նկատմամբ իսրայելական հնարավոր վերահսկողության հաստատումը կարող է հանգեցնել լայնածավալ կրոնական հակամարտության։ Այս մասին գրում է «The Guardian»-ը։
Հորդանանի նախաձեռնությամբ օգոստոսի 5-ին նախատեսվում է արաբական և իսլամական երկրների արտաքին գործերի նախարարների արտահերթ հանդիպում՝ քննարկելու Երուսաղեմի սրբավայրի շուրջ ստեղծված իրավիճակը։ Հորդանանի իշխանությունների խոսքով՝ վերջին շրջանում աճել են հրեա ծայրահեղական խմբերի կողմից Ալ-Աքսա մզկիթի տարածք մուտք գործելու և այնտեղ կրոնական արարողություններ իրականացնելու դեպքերը։ Ամմանը դրանք համարում է Երուսաղեմի սրբավայրերի գործող կարգավիճակի խախտում։
Հորդանանի արտաքին գործերի նախարար Այման Սաֆադին հայտարարել է, որ Ալ-Աքսայի տարածքի շուրջ ցանկացած փոփոխություն կարող է «կրոնական հակամարտություն առաջացնել, որի հետևանքները կտարածվեն ոչ միայն Պաղեստինի և Հորդանանի, այլև ամբողջ մահմեդական աշխարհի վրա»։
Ալ-Աքսա մզկիթի տարածքի կառավարումը երկար տարիներ գտնվում է Հորդանանի Հաշիմյան միապետության վերահսկողության ներքո։ 1994 թվականին Իսրայելի և Հորդանանի միջև կնքված խաղաղության պայմանագրով ևս ամրագրվել է Հորդանանի հատուկ դերը Երուսաղեմի մահմեդական սրբավայրերի նկատմամբ։
Ըստ «The Guardian»-ի՝ Հորդանանը հատկապես մտահոգված է, որ Իսրայելի աջակողմյան ուժերը կարող են փորձել փոխել այդ պայմանավորվածությունները։ Ամման նաև զգուշացնում է Հորդանան գետի Արևմտյան ափից պաղեստինցիների հնարավոր զանգվածային տեղահանման վտանգի մասին։
«Մենք թույլ չենք տա, որ որևէ փորձ արվի պաղեստինցիներին Հորդանան տեղափոխելու ուղղությամբ»,- հայտարարել է Սաֆադին՝ նշելով, որ դա կդառնա միջազգային իրավունքի խախտում և կվտանգի տարածաշրջանի կայունությունը։
Հետևեք մեզ տելեգրամում
