Թուրքիայի «Ազգայնական շարժում» կուսակցության առաջնորդ Դևլեթ Բահչելին կրկին հանդես է եկել Քրդստանի աշխատավորական կուսակցության (PKK) առաջնորդ Աբդուլլահ Օջալանին «հույսի իրավունք» տրամադրելու կոչով։ Նա նաև հայտարարել է, որ ազատ արձակման հնարավորություն պետք է տրվի նաև քրդամետ Ժողովուրդների դեմոկրատական կուսակցության (HDP) նախկին համանախագահ Սելահաթթին Դեմիրթաշին: Այս մասին հայտնում են թուրքական ԶԼՄ-ները։
Նրա խոսքով՝ ինքը Դեմիրթաշի հետ կապ է պահպանում փաստաբանների միջոցով։ «Սելահաթթին Դեմիրթաշը պետք է վերադառնա տուն, Ահմեթները (Մարդինի նախկին քաղաքապետ Ահմեթ Թուրքը և Էսենյուրթի նախկին քաղաքապետ Ահմեթ Օզերը) պետք է վերադառնան իրենց պաշտոններին, իսկ Օջալանին պետք է տրամադրվի «հույսի իրավունքը»*։ Թուրքիան պետք է խաղաղություն գտնի։ Մեր նպատակը Թուրքիայի և ողջ տարածաշրջանի խաղաղությունն է»,- նշել է Բահչելին։
Բահչելին այս հայտարարությունն արել է այն բանից հետո, երբ ստորագրել է «ահաբեկչությունից զերծ Թուրքիա» նախաձեռնության շրջանակում մշակված օրինագիծը։ Այն նախատեսում է ստեղծել իրավական հիմք PKK-ի զինաթափման և ինքնալուծարման գործընթացի հաջորդ փուլի համար, այդ թվում՝ սահմանելով պատժաչափերի մեղմացման կանոններ PKK անդամների կամ կառույցի հետ համագործակցողների համար։
«Այս ստորագրությամբ մեր հազարամյա եղբայրությունը կրկին հաստատվեց։ Հաղթեցին թուրքերը, քրդերը և բոլորը՝ անկախ լեզվից կամ ինքնությունից։ Հաղթեցին Թուրքիայի 86 միլիոն քաղաքացիները և Մերձավոր Արևելքի ժողովուրդները։ Միաժամանակ առաջին քայլն արվեց՝ խափանելու գլոբալ նախագծերը»,- ասել է նա։
Բահչելին նշել է, որ նախաձեռնությունը պետական նախագիծ է և իրականացվում է նախագահի, խորհրդարանի և պետական կառույցների համակարգված աշխատանքի շրջանակում։ Միաժամանակ, իշխող Արդարություն և զարգացում կուսակցության խորհրդարանական խմբակցության ղեկավար Աբդուլլահ Գյուլերը հայտարարել է, որ օրենքը կգործի միայն այն բանից հետո, երբ պետական մարմինները պաշտոնապես հաստատեն, որ PKK-ն և դրա բոլոր կառույցները լիովին զինաթափվել և ինքնալուծարվել են։
Նրա խոսքով՝ օրինագիծը վերաբերում է PKK-ի հետ կապված մի շարք «հանցագործությունների», այդ թվում՝ անդամակցությանը, ղեկավարությանը, օժանդակությանը և քարոզչությանը, սակայն չի տարածվում դիտավորությամբ սպանությունների և ցմահ կամ խիստ ցմահ ազատազրկմամբ պատժվող հանցագործությունների վրա։
Օրինագիծը խորհրդարան է ներկայացվել շուրջ 360 պատգամավորի ստորագրությամբ, այդ թվում՝ խորհրդարանի նախագահ Նուման Քուրթուլմուշի և Դևլեթ Բահչելիի կողմից։ Սպասվում է, որ այն պարտադիր սպասման ժամկետից հետո կքննարկվի Թուրքիայի Ազգային մեծ ժողովի արդարադատության հանձնաժողովում։
*«Հույսի իրավունքը» Մարդու իրավունքների եվրոպական դատարանի իրավական սկզբունք է, որի համաձայն՝ ցմահ ազատազրկված անձին պետք է տրվի ազատ արձակվելու իրատեսական հնարավորություն՝ պատժի պարբերական վերանայման միջոցով, եթե նա ապացուցել է իր վերասոցիալականացումը։
Հետևեք մեզ տելեգրամում
