Վենսը պահանջել է Ուկրաինայից դադարեցնել Կասպյան խողովակաշարի վրա հարվածները

ԱՄՆ փոխնախագահ Ջեյ Դի Վենսը անձամբ Ուկրաինայի նախագահ Վլադիմիր Զելենսկիին է փոխանցել Վաշինգտոնի պահանջը՝ դադարեցնել Կասպյան խողովակաշարային կոնսորցիումի (ԿԽԿ) ենթակառուցվածքների ուղղությամբ հարվածները։ Այս մասին հայտնել է «Financial Times»-ը։

Ուկրաինական աղբյուրը «FT»-ին հայտնել է, որ Կիևը համաձայնել է ԱՄՆ-ի պահանջին՝ Վաշինգտոնից «Patriot» համակարգերի համար հրթիռային որսիչներ արտադրելու լիցենզիա ստանալու ակնկալիքով։ Ավելի վաղ՝ օգոստոսի 8-ին, «Bloomberg»-ը հայտնել էր, որ Ուկրաինան ԱՄՆ-ի խնդրանքով պարտավորվել է չհարվածել Սև ծովում այն նավթային ենթակառուցվածքներին և նավերին, որոնք կապված չեն Ռուսաստանի հետ և ապահովում են Ղազախստանի նավթի արտահանումը։

Նշենք, որ Կասպյան խողովակաշարային կոնսորցիումը Ղազախստանից նավթի արտահանման հիմնական ուղիներից մեկն է։ Կոնսորցիումում բաժնեմասեր ունեն նաև ամերիկյան «Chevron» և «ExxonMobil» ընկերությունները։