Հայաստանը Լեհաստանում ռազմական կցորդի պաշտոն կստեղծի։ «Արմենպրես» լրատվական գործակալության փոխանցմամբ՝ ՀՀ կառավարության օգոստոսի 27-ի նիստում ընդունված որոշմամբ նախատեսվում է Լեհաստանում Հայաստանի դեսպանությանը կից սահմանել ռազմական կցորդի հաստիք, իսկ նշանակված անձը իր պարտականությունները կստանձնի 2027 թվականի հունվարի 1-ից։
Որոշման անհրաժեշտությունը պայմանավորված է Հայաստանի և Լեհաստանի միջև պաշտպանության և ռազմատեխնիկական համագործակցության խորացման նպատակով։ Երկու երկրների միջև պաշտպանական համագործակցության հիմքում, մասնավորապես, 2004 թվականին ստորագրված պաշտպանության ոլորտում համագործակցության մասին համաձայնագիրն է, ինչպես նաև 2026 թվականի փետրվարի 26-ին Վարշավայում ստորագրված ռազմատեխնիկական համագործակցության մասին նոր համաձայնագիրը։
ՀՀ կառավարության հիմնավորման համաձայն՝ ռազմական կցորդի ներկայությունը Լեհաստանում պետք է նոր խթան հաղորդի երկու երկրների պաշտպանական գերատեսչությունների միջև համագործակցությանը և նպաստի ռազմատեխնիկական ոլորտում փոխգործակցության ընդլայնմանը։
Ներկայում Հայաստանի և Լեհաստանի պաշտպանական համագործակցությունն ընդգրկում է հրահանգիչների պատրաստում, միջազգային խաղաղապահ առաքելություններին համատեղ մասնակցություն, զինված ուժերում քաղաքացիական վերահսկողության, ներքին աուդիտի և հակակոռուպցիոն մեխանիզմների ներդրման ոլորտներում փորձի փոխանակում։
Հետագայում նախատեսվում է համագործակցությունն ընդլայնել նաև ռազմական կրթության, սերժանտական կազմի պատրաստության, անձնակազմի մարտական պատրաստության, ռազմական բժշկության և այլ ուղղություններով։
Ռազմական կցորդը, մասնավորապես, պատասխանատու կլինի երկու երկրների ռազմական գերատեսչությունների միջև պաշտոնական կապերի հաստատման և խորացման, համագործակցության ծրագրերի իրականացման մշտադիտարկման, ինչպես նաև հայկական պատվիրակությունների այցերի կազմակերպմանն աջակցելու համար։
Նա նաև կապահովի հայկական կողմի ներկայացվածությունը Լեհաստանում անցկացվող զորահանդեսներին, զորավարժություններին, սպառազինության և ռազմական տեխնիկայի ցուցահանդեսներին, ինչպես նաև այցերը ռազմաուսումնական հաստատություններ և ռազմարդյունաբերական ձեռնարկություններ։
Կառավարության հիմնավորման մեջ ընդգծվում է, որ Հայաստանը Լեհաստանը դիտարկում է նաև որպես կարևոր կամուրջ Հայաստանի և ՆԱՏՕ-ի, ինչպես նաև Եվրոպական միության միջև։
Նշվում է, որ ռազմական կցորդի պաշտոնի ստեղծումը իրավական հիմք կստեղծի նրա գործունեության համար և նոր որակ կհաղորդի Հայաստանի ու Լեհաստանի պաշտպանական և ռազմատեխնիկական գործընկերությանը։
Հետևեք մեզ տելեգրամում
