ԱՄՆ նախագահ Դոնալդ Թրամփի որդին և «The Trump Organization»-ի գործադիր փոխնախագահ Էրիկ Թրամփը հաջորդ շաբաթ կայցելի Թբիլիսի՝ մասնակցելու «Trump Tower Tbilisi»-ի նախագծի պաշտոնական ներկայացմանը: Այս մասին հաղորդում է «NewsGeorgia»-ն։
Նախատեսվում է, որ նախկին հիպոդրոմի տարածքում կառուցվող «The Downtown Tbilisi» համալիրի կենտրոնական աշտարակը կունենա մոտ 259 մետր բարձրություն և մինչև 70 հարկ։ Նախագծի հայտարարված չափորոշիչներով այն կարող է դառնալ Վրաստանի ամենաբարձր շենքը։ Համալիրի ընդհանուր ներդրումները գնահատվում են մոտ 2 միլիարդ դոլար, իսկ միայն «Trump Tower»-ի շինարարության ուղղակի ծախսերը՝ ավելի քան 200 միլիոն դոլար։ Աշտարակը լինելու է վեց երկնաքերերից բաղկացած համալիրի մի մասը։
Բնակարանների վաճառքի մեկնարկային գինը նախատեսվում է 1 քառակուսի մետրի համար 7-10 հազար դոլար։ Վերին հարկերում այն կարող է հասնել մինչև 15 հազար դոլարի, ինչը ռեկորդային գին կլինի Վրաստանի անշարժ գույքի շուկայում։
Նշվում է, որ նախագծի հիմնական թիրախային գնորդները Վրաստանի քաղաքացիները չեն, այլ ապահովված օտարերկրացիները, արտագաղթածները և դիվանագետները։ Նախնական հայտեր արդեն ստացվել են Դուբայից, իսկ վաճառքները նախատեսվում է ակտիվորեն իրականացնել նաև Իսրայելում։ Գլխավոր կապալառուի ընտրությունը, ամենայն հավանականությամբ, կկատարվի Թուրքիայի կամ Ադրբեջանի խոշոր շինարարական ընկերությունների միջև։
Միաժամանակ, «The Trump Organization»-ը ֆինանսական ներդրում չի կատարում աշտարակի շինարարության մեջ։ Վրացի կառուցապատողները վճարում են «Trump» ապրանքանիշն օգտագործելու իրավունքի համար, իսկ Թրամփի ընտանիքին պատկանող ընկերությունը ստանում է նախնական վճար, ինչպես նաև վաճառքից և հետագա եկամուտներից տոկոս։
Կառուցապատողները հողատարածքը ձեռք են բերել Բիձինա Իվանիշվիլիի ընտանիքին պատկանող հիմնադրամից։ «The Wall Street Journal»-ի տվյալներով՝ վճարումների ընդհանուր գումարը կազմել է մինչև 85 միլիոն դոլար, իսկ վերջնական հաշվարկն ավարտվել է այս տարվա հուլիսին։
Վրաստանում սա «Trump Tower»-ի կառուցման երկրորդ փորձն է։ Առաջին նախագիծը Դոնալդ Թրամփը և Վրաստանի այն ժամանակվա նախագահ Միխեիլ Սաակաշվիլին ներկայացրել էին Բաթումիում 2012 թվականին, սակայն այն այդպես էլ չի իրականացվել։
Հետևեք մեզ տելեգրամում
