Սիրիայի ժամանակավոր նախագահ Ահմադ ալ-Շարաան հայտարարել է, որ տարածաշրջանում երկարատև խաղաղության հասնելու համար անհրաժեշտ է դադարեցնել Սիրիայի տարածքների օկուպացիան և վերականգնել երկրի իրավունքները։ Նրա խոսքով՝ Իսրայելը շարունակում է հարվածներ հասցնել Սիրիային և վերահսկել այն տարածքները, որոնք գրավել է Բաշար Ասադի իշխանության տապալումից հետո։ Այս մասին նա ասել է Նյու Յորքում՝ ՄԱԿ-ի Գլխավոր ասամբլեայի շրջանակում անցկացված քննարկման ժամանակ։
Ալ-Շարաան նշել է, որ Սիրիան բանակցություններ է վարում տարբեր երկրների, այդ թվում՝ ԱՄՆ-ի հետ։ Նրա խոսքով՝ Իսրայելի հետ ուղիղ բանակցությունները սկսվել են մոտ մեկուկես տարի առաջ, սակայն ընդհատվել են։ Առաջին փուլում քննարկվել է 1974 թվականի սահմաններից այն կողմ իսրայելական ուժերի առաջխաղացման և անվտանգության համաձայնագրի կնքման հարցը։
Նա նշել է, որ այդ հարցում համաձայնության հասնելու դեպքում հնարավոր կլինի քննարկել նաև երկարաժամկետ խաղաղությունն ու Գոլանի բարձունքների հարցը։ Նշենք, որ Գոլանի բարձունքները Իսրայելի վերահսկողության տակ գտնվող տարածք են, որը Սիրիան իրենն է համարում։
Ալ-Շարաան նաև ասել է, որ Սիրիան ցանկանում է դուրս բերել օտարերկրյա ռազմական ուժերը երկրից։ Նրա խոսքով՝ Ռուսաստանի հետ քննարկվում է երկու ռազմաբազաների պահպանման և դրանք սիրիական բանակի պատրաստման կենտրոնների վերածելու հարցը, իսկ թուրքական ուժերի ներկայության վերաբերյալ նույնպես բանակցություններ են ընթանում։
Հետևեք մեզ տելեգրամում
