Ղազախստանի ռազմածովային ուժերի զորավարժության ժամանակ Կասպից ծովն ընկած 12 զինծառայող է զոհվել, ևս երեքին հաջողվել է փրկել, երկու զինծառայողի որոնումները շարունակվում են։ Այս մասին հայտնում է BBC-ին:
Միջադեպը տեղի է ունեցել սեպտեմբերի 24-ին, Ղազախստանի հարավ-արևմուտքում գտնվող Մանգիստաուի շրջանում։ Երկրի փոխվարչապետ Կանատ Բոզումբաևի խոսքով՝ ծովն է ընկել 17 զինծառայող։ Պատահարը տեղի է ունեցել ուսումնամարտական առաջադրանք կատարելիս՝ եղանակային պայմանների կտրուկ վատթարացման և քամու ուժգնացման հետևանքով։
Ղազախստանի պաշտպանության նախարարությունը չի հստակեցրել միջադեպի հանգամանքները և զորավարժության անվանումը, սակայն սեպտեմբերի 22-ին գերատեսչությունը հայտնել էր Կասպից ծովի ղազախական հատվածում «Կասպիցի պաշտպանություն-2026» զորավարժության անցկացման մասին։ Վարժանքներին մասնակցում է ավելի քան 500 զինծառայող, ինչպես նաև ռազմանավեր և առափնյա ստորաբաժանումներ։
Սեպտեմբերի 24-ի երեկոյան Ղազախստանի պաշտպանության նախարարությունը հրապարակել է զոհված 12 զինծառայողների անունները։ Նրանցից 11-ը ժամկետային զինծառայողներ են, մեկը՝ ավագ լեյտենանտ։
Ղազախստանի նախագահ Կասիմ-Ժոմարտ Տոկաևը սեպտեմբերի 25-ը հայտարարել է ազգային սգո օր։
Հետևեք մեզ տելեգրամում
