Իրանի արտգործնախարար Աբբաս Արաղչին հայտարարել է, որ ԱՄՆ-ին առաջարկել է Հորմուզի նեղուցը յոթ օրվա ընթացքում վերաբացելուն ուղղված ծրագիր։ Այս մասին հայտնել է «Al Jazeera»-ն։
Արաղչին հայտնել է, որ Իրանը ծրագիրը միջնորդների միջոցով է փոխանցել ԱՄՆ-ին։ Միջնորդական հաղորդակցությունը երկու երկրների միջև իրականացնում է Կատարը՝ Նյու Յորքում ընթացող ՄԱԿ-ի Գլխավոր ասամբլեայի շրջանակում։
Արաղչին լրագրողներին հայտնել է, որ ժամանակացույցը կարող է մեկնարկել այն պահից, երբ Վաշինգտոնը կընդունի առաջարկը․
«Եթե որոշակի պայմաններ կատարվեն, Հորմուզի նեղուցը յոթերորդ օրվա ավարտին կբացվի, իսկ [խաղաղության] բանակցությունները կվերսկսվեն»,- ասել է նա։
Նախարարը ծրագրի մանրամասները չի ներկայացրել, սակայն նշել է, որ այն նման է Իրանի և ԱՄՆ-ի միջև հունիսի 17-ին ստորագրված փոխըմբռնման հուշագրին, որը կարճ ժամանակով թուլացրել էր հակամարտությունը, սակայն հետագայում տապալվել էր։
Փորձագետների գնահատմամբ՝ Իրանը ցանկանում է պահպանել նախկինում ձեռք բերված համաձայնության մոտեցումը, որի համաձայն՝ նեղուցի կառավարման հարցում առանցքային դեր պետք է ունենան Իրանը և Օմանը, իսկ դրանից հետո քննարկվեն ավելի լայն խաղաղության պայմանները։
Միևնույն ժամանակ, ԱՄՆ-ը, որը հայտարարել է, թե Հորմուզի նեղուցն իր «լիակատար վերահսկողության» ներքո է, ցանկանում է սկզբում քննարկել Իրանի միջուկային ծրագիրը։
Իրանը նախկինում հայտարարել է, որ չի պատրաստվում մասնակցել ավելի լայն խաղաղ բանակցությունների, այդ թվում՝ միջուկային ծրագրի վերաբերյալ քննարկումների, քանի դեռ ԱՄՆ-ը չի վերացրել Հորմուզի նեղուցի շրջակայքում իր նավահանգիստների նկատմամբ սահմանված ռազմածովային շրջափակումը, չի չեղարկել պատժամիջոցները և չի տրամադրել հարվածները դադարեցնելու երաշխիք։
Հետևեք մեզ տելեգրամում
