Ղոմի իսլամական իրավագիտության կենտրոնի ղեկավար Ֆազել Լանքարանին քննադատել է Ադրբեջանի դպրոցներում հիջաբի արգելքը՝ կոչ անելով երկրի իշխանություններին հրաժարվել կրոնական կանոններին հակասող քաղաքականությունից։ Նա նաև աջակցություն է հայտնել հիջաբի արգելքի դեմ բողոքողներին և կոչ արել շարունակել բողոքի ակցիաները։
Ինչպես հայտնում է Region Monitor-ը, իրանական ISNA գործակալության փոխանցմամբ՝ Լանքարանին հայտարարել է, որ անընդունելի է համարում նման սահմանափակումները մի երկրում, որի բնակչության մեծամասնությունը մուսուլման է և դավանում է շիա իսլամը։
«Չափազանց ցավալի է, որ մի երկրում, որտեղ բնակչության մեծամասնությունը մուսուլման և շիա է, կառավարությունը դիմում է մի քայլի, որը համահունչ է անհավատության ոգուն»,- ասել է նա։
Իրանցի հոգևորականը պնդել է, որ հիջաբի դեմ պայքարը կրոնական ազատությունների սահմանափակման դրսևորում է՝ այն կապելով նաև եվրոպական մի շարք երկրներում կիրառվող սահմանափակումների հետ։ Նա Ադրբեջանի իշխանություններին կոչ է արել վերանայել իրենց մոտեցումը։
«Ո՞վ է ասել, թե հիջաբը խոչընդոտում է կրթությանը։ Ինչո՞ւ այս հարցը պատշաճ կերպով չեք ուսումնասիրում։ Ինչո՞ւ եք տրվել անհավատությանը։ Մի՞թե այն ամենը, ինչ նրանք ասում են, դուք պետք է ընդունեք»,- հայտարարել է Լանքարանին։
Նա նաև զգուշացրել է, որ կրոնի դեմ պայքարը կարող է ծանր հետևանքներ ունենալ Ադրբեջանի իշխանությունների համար։
«Ադրբեջանի կառավարությունը թող իմանա, որ կրոնի դեմ պայքարը, առանց որևէ կասկածի, այլ արդյունք չի ունենա, քան հենց իրենց կործանումը»,- ասել է նա՝ միաժամանակ շնորհակալություն հայտնելով Ադրբեջանի քաղաքացիներին վերջին օրերին բողոքի ակցիաներ անցկացնելու համար։ «Շնորհակալություն եմ հայտնում Ադրբեջանի սիրելի ժողովրդին, որը վերջին օրերին ցույցեր և բողոքի ակցիաներ է անցկացրել, և խնդրում եմ նրանց շարունակել այս բողոքները»,- նշել է հոգևորականը։
Լանքարանին հիջաբ կրելու իրավունքը ներկայացրել է որպես անձնական ազատության հարց՝ հարցադրելով, թե ինչու պետք է սահմանափակվի այն կանանց ազատությունը, որոնք ցանկանում են կրոնական հագուստ կրել։ «Եթե խոսքը ազատության մասին է, ապա ինչո՞ւ մուսուլման աղջիկը, ով ցանկանում է չադրա և հիջաբ կրել, չպետք է ազատ լինի»,- ասել է նա։
Իրանցի հոգևորականը նաև հայտարարել է, որ Իրանի ժողովուրդն աջակցում է Ադրբեջանի ժողովրդին, և հույս հայտնել, որ Իրանի պաշտոնյաները նույնպես կդատապարտեն այդ սահմանափակումները և համապատասխան քայլեր կձեռնարկեն։
Միաժամանակ, իրանական թելեգրամյան ալիքներում տարածվում են տեսանյութեր և լուսանկարներ, որոնցում հիջաբի հարցի շուրջ հնչող դժգոհությունն ուղեկցվում է Ադրբեջանի նախագահ Իլհամ Ալիևի հասցեին ուղղված քննադատությամբ։
Տարածվող տեսանյութերից մեկում ակցիայի մասնակիցները վանկարկում են. «Հիջաբը պատվարժան մարդկանց պատիվն է, անեծք անպատիվ Ալիևին»։
Իրանական ալիքներում հրապարակվել է նաև Թեհրանում Ադրբեջանի դեսպանատան շենքից արված լուսանկար, որում երևում է հետևյալ գրությամբ պաստառը. «Մուսուլման ժողովրդի դեմ բացահայտ պատերազմն իսլամական հեղափոխության սկիզբն է։ Իրանի և Ադրբեջանի մուսուլման ժողովուրդը պատրաստ է պայքարելու ևս մեկ Ռեզա խանի դեմ»։ Պաստառի վրա նշված է նաև «Բաքվի բռնապետ» և «Ադրբեջանի իսլամական հեղափոխություն» գրառումները։
Հիշեցնենք, որ Ադրբեջանի կառավարությունը փոփոխություններ է իրականացրել դպրոցական միասնական համազգեստի կանոններում՝ արգելելով «այն տարրերը, որոնք չեն համապատասխանում աշխարհիկ կրթության սկզբունքին»։ Թեև որոշման մեջ հիջաբի մասին ուղղակիորեն նշված չէ, հոկտեմբերի 9-ից դպրոցներում ստուգումներ են սկսվել, իսկ գլխաշոր կրող աշակերտուհիներին հեռացրել են դասերից։ Գլխաշոր չկրելու պահանջ է ներկայացվել նաև ուսուցչուհիներին։
Հետևեք մեզ տելեգրամում
