Իրանի ազգային գազային ընկերությունը (NIGC) և ռուսական «Գազպրոմ»-ը քննարկում են ռուսական գազի մատակարարման համար անհրաժեշտ գազամուղի երթուղին, ինչպես նաև գնագոյացման մեխանիզմները։ Այս մասին «Ռուսական էներգետիկ շաբաթ» համաժողովի շրջանակում լրագրողներին հայտնել է Իրանի նավթի փոխնախարար, NIGC-ի ղեկավար Սայիդ Թավաքոլին։ Region Monitor-ի փոխանցմամբ՝ այս մասին հաղորդում է ռուսաստանյան ТАСС լրատվական գործակալությունը։
Նա նշել է, որ 2024 թվականին «Գազպրոմի» և NIGC-ի միջև Իրան ռուսական գազի մատակարարումների կազմակերպման վերաբերյալ ռազմավարական հուշագրի ստորագրումից հետո ընկերությունները տեխնիկական հարցերի շուրջ բանակցություններ են անցկացնում։
«Հուշագրի տարբեր հատվածներին վերաբերող բոլոր պայմանավորվածությունները կատարված են։ Մնում են միայն [գազամուղի] երթուղու որոշման, ինչպես նաև [ռուսական] գազի գնման և վաճառքի գնագոյացման մեխանիզմների հարցերը։ Հենց որ այս երկու-երեք հարցերը կարգավորվեն, հույս ունենք, ամեն ինչ կլուծվի»,- հավելել է նա։
Իրանական ընկերության ղեկավարը շեշտել է նաև, որ Իրանը, ունենալով աշխարհագրական եզակի դիրք, կարող է իրար կապել Հարավային Կովկասն ու Պարսից ծոցի երկրները։
Հիշեցնենք, որ ավելի վաղ ՌԴ փոխվարչապետ Ալեքսանդր Նովակը հայտնել էր, որ իրանական կողմը հետաքրքրված է Ռուսաստանից գազի մատակարարումներով։ Թեհրանն ու Մոսկվան, Կատարի և Թուրքմենստանի մասնակցությամբ, քննարկում են էներգետիկ հաբի ստեղծումը, ինչպես նաև սվոփ մատակարարումների հնարավորությունը։
Հավելենք, որ ՌԴ-ում Իրանի արտակարգ և լիազոր դեսպան Քազեմ Ջալալիի խոսքով՝ գազամուղի կառուցման ծախսերի հիմնական մասը հոգալու է ռուսական կողմը, իսկ գազամուղն անցնելու է Ադրբեջանի տարածքով։
Հետևեք մեզ տելեգրամում
