Ֆրանսիայի Նիցցա քաղաքի քաղաքապետ Էրիկ Սիոտին մտադիր է նախաձեռնությամբ հանդես գալ՝ առաջարկելով Լեռնային Ղարաբաղից գերեվարված 20 հայի շնորհել քաղաքի պատվավոր քաղաքացու կոչում։
«Ես պարտավորվել եմ առաջարկել, որ Արցախից գերեվարված 20 հայերը դառնան Նիցցայի պատվավոր քաղաքացիներ»,- «Region Monitor»-ի փոխանցմամբ, X սոցիալական ցանցում գրել է Սիոտին։
Նրա խոսքով՝ այս խորհրդանշական քայլը նպատակ ունի արտահայտելու համերաշխությունը Բաքվում անարդարացիորեն պահվող հայերի նկատմամբ։ Նիցցայի քաղաքապետը նաև ընդգծել է, որ քաղաքը շարունակելու է ջանքեր գործադրել մինչև նրանց ազատ արձակումը։
Հիշեցնենք, որ 2026 թվականի փետրվարի 5-ին Բաքվի դատարանը ցմահ ազատազրկման է դատապարտել Լեռնային Ղարաբաղի նախկին նախագահ Արայիկ Հարությունյանին, Պաշտպանության բանակի նախկին հրամանատարներ Լևոն Մնացականյանին և Դավիթ Մանուկյանին, Ազգային ժողովի նախկին նախագահ Դավիթ Իշխանյանին և նախկին արտգործնախարար Դավիթ Բաբայանին։
Իսկ նախկին նախագահներ Արկադի Ղուկասյանն ու Բակո Սահակյանը դատապարտվել են 20 տարվա ազատազրկման։
Փետրվարի 17-ին 20 տարվա ազատազրկման է դատապարտվել նաև ԼՂ նախկին պետնախարար Ռուբեն Վարդանյանը։ Նրա պաշտպանական կողմը մերժել է առաջադրված մեղադրանքները՝ հայտարարելով արդար դատաքննության իրավունքի խախտումների մասին։
Ադրբեջանում պահվող հայ ռազմագերիների և քաղաքացիական անձանց ստույգ թիվը հայտնի չէ։ Բաքվի տվյալներով՝ պահվում է շուրջ 30 հայ, մինչդեռ հայկական իրավապաշտպան կազմակերպությունների գնահատմամբ՝ նրանց իրական թիվը կարող է մոտ 80-ով ավելի լինել։
Հետևեք մեզ տելեգրամում
