Իրանի նախագահի առաջին տեղակալ Մոհամմադ Ռեզա Արեֆը կոչ է արել երկրի առողջապահության և կրթության նախարարներին, ինչպես նաև Իսլամական Ազատ համալսարանի ղեկավարությանը՝ անհրաժեշտ պայմաններ ստեղծել Ադրբեջանի հիջաբով աշակերտների և ուսանողների ընդունելության ու կրթությունը շարունակելու համար։
Region Monitor-ի հաղորդմամբ՝ Արեֆը X-ի իր էջում շնորհակալություն է հայտնել Իրանի գիտության, հետազոտությունների և տեխնոլոգիաների նախարարությանը՝ ադրբեջանցի աղջիկներին իրանական համալսարաններում սովորելու հնարավորություն առաջարկելու համար։ «Առողջապահության և կրթության հարգարժան նախարարներին, ինչպես նաև Իսլամական Ազատ համալսարանի հարգարժան ռեկտորին նույնպես խնդրում եմ ձեռնարկել անհրաժեշտ միջոցներ ադրբեջանցի աշակերտների և ուսանողների ընդունելությունը կազմակերպելու ու ուսումը շարունակելու համար»,- նշել է Արեֆը։
Ավելի վաղ Իրանի գիտության նախարար Հոսեյն Սիմային հայտարարել էր, որ Ադրբեջանի աղջիկների առաջ Իրանի համալսարանների դռները բաց են։ Նա խոստացել էր աջակցել այն աղջիկներին, որոնք իրենց երկրում հիջաբ կրելու պատճառով զրկվել են կրթությունը շարունակելու հնարավորությունից։
Հիշեցնենք, որ Ադրբեջանում սեպտեմբերի 21-ին ընդունված դպրոցական համազգեստի նոր կանոնների կիրառումից հետո հիջաբ կրող աշակերտուհիներին սկսել են թույլ չտալ դպրոցներ մտնել, ինչն էլ այդ երկրում բողոքի ակցիաների պատճառ է դարձել:
Հետևեք մեզ տելեգրամում
