Հուլիսի 12-ին և 13-ին Ադրբեջանի զինված ուժերի կողմից ՀՀ Տավուշի մարզի ուղղությամբ սանձազերծված ռազմական գործողություններում Ադրբեջանը լուրջ վնասներ է կրել։
Ադրբեջանի պաշտպանության նախարարությունը հուլիսի 13-ի առավոտյան պաշտոնապես հայտարարել է սպանված չորրորդ ադրբեջանցի զինվորի մասին։ Ըստ պաշտոնական տեղեկատվության՝ վիրավորվել է ընդամենը 5 զինվոր։
Մինչդեռ սոցցանցերի թուրքական և ադրբեջանական տիրույթում կատարվող հրապարակումների համաձայն՝ իրավիճակը շատ ավելի բարդ է։ Այսպես, «Twitter»-ի թուրք օգտատերերի շրջանում տեղեկություններ են շրջանառվում առ այն, որ ադրբեջանական բանակը բախումների արդյունքում 81 վիրավոր ունի։
Ավելի վաղ անդրադարձել էինք ադրբեջանցի օգտատերերի այն հրապարակումներին, որ Ադրբեջանի ԶՈՒ-ն առնվազն 17 կորուստ ունի։
Հիշեցնենք, որ Ադրբեջանի զինված ուժերի զինծառայողները հուլիսի 12-ին՝ ժամը 12:30-ի սահմաններում, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել: Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք: Այնուհետև Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել են հայկական կողմից և, կորուստներ կրելով, հետ շպրտվել։ Հրետակոծությունը ադրբեջանական կողմից շարունակվել է նաև հուլիսի 13-ի առավոտյան։
Հետևեք մեզ տելեգրամում
