ՀՀ վարչապետի մամուլի խոսնակ Մանե Գևորգյանը հայտնել է, որ Հայաստանը Լիբանանին դեղորայք, բժշկական սարքավորումներ, սնունդ եւ այլ պարագաներ կուղարկի։
«ՀՀ կառավարությունը՝ Արտաքին գործերի նախարարության եւ Սփյուռքի գործերի գլխավոր հանձնակատարի գրասենյակի միջոցով մշտական կապի մեջ է Լիբանանի կառավարության և համայնքային կառույցների ղեկավարների հետ՝ մեր երկրից եղբայրական Լիբանանին օգնություն ցուցաբերելու նպատակով: Քննարկումների արդյունքում հստակեցվել են կարիքների հիմնական ուղղությունները, որոնց շրջանակում էլ ՀՀ կառավարությունը թիրախային օգնություն կհասցնի Բեյրութ՝ ինչպես կառավարական, այնպես էլ համայնքային մակարդակով։ ՀՀ կառավարության օգնությունը տեղ կհասնի հնարավորինս արագ՝ հատուկ չվերթով», – գրել է Գևորգյանը։
Նշենք, որ վարչապետ Փաշինյանը հեռախոսազրույց է ունեցել Լիբանանի նախագահ Միշել Աունի հետ՝ Հայաստանի իշխանությունների պատրաստակամությունը հայտնելով օժանդակություն ցուցաբերել բարեկամ Լիբանանին եւ նրա եղբայրական ժողովրդին:
Հիշեցնենք, որ օգոստոսի 4-ին Լիբանանի մայրաքաղաք Բեյրութի նավահանգստի տարածքում գտնվող պայթուցիկ նյութերի պահեստում հզոր պայթյուն է տեղի ունեցել: Երկրում օգոստոսի 5-ը սգո օր է հայտարարվել։ Վերջին տվյալներով՝ զոհերի թիվը գերազանցել է 100-ը, վնասվել է ավելի քան 4 հազար մարդ:
Հետևեք մեզ տելեգրամում
