Միջերկրական ծովի արևելյան հատվածում թուրք-հունական հարաբերություններում առկա լարվածությունը շարունակում է սրվել:
Թուրքիան Միջերկրական ծովի արևելյան հատվածում կրակային ուսումնավարժանքներ իրականացնելու մասին Navtex-ի (նավիգացիոն տելեքս) նոր ծանուցագիր է հրապարակել:
Այս մասին հաղորդագրություն է հրապարակել Թուրքիայի պաշտպանության նախարարությունը:
Նշվում է, որ կրակային ուսումնավարժանքները կանցկացվեն սեպտեմբերի 1-2-ը:
Հիշեցնենք, որ Թուրքիան երկարաձգել էր «Oruç Reis» նավի մասնակցությամբ Արևելյան Միջերկրականի ջրերում սեյսմիկ հետազոտություններ իրականացնելու համար հայտարարած NAVTEX (միջազգային զգուշացում որևէ ջրային տարածքում գործողություններ իրականացնելու մասին) ժամկետը, ըստ որի՝ ավարտն օգոստոսի 23-ի փոխարեն պետք է լինի օգոստոսի 27-ը։
NAVTEX-ի ժամկետները երկարաձգելու մասին Անկարայի հայտարարությունից հետո Միջերկրական ծովում զորավարժություններ անցկացնելու նպատակով NAVTEX էր հայտարարել նաև Հունաստանը։ Սրան ի պատասխան՝ Թուրքիան էլ էր առանձին NAVTEX հայտարարել հետազոտությունների անցկացման վայրից ոչ հեռու մեկօրյա վարժանք անցկացնելու նպատակով։
Նախօրեին Արևելյան Միջերկրականում Ֆրանսիայի, Կիպրոսի Հանրապետության և Իտալիայի մասնակցությամբ եռօրյա զորավարժություններ անցկացնելու մասին ևս մեկ NAVTEX-ի ծանուցագիր հրապարակեց նաև Հունաստանը:
Հետևեք մեզ տելեգրամում
