Վրաստանում տեղի ունեցող բողոքի ակցիաների ընթացքում նոյեմբերի 25-ին՝ երեկոյան ժամերին ցուցարարները արգելափակել են խորհրդարանի շենքը՝ նպատակ ունենալով տապալել նոյեմբերի 26-ին տեղի ունենալիք նիստը:
Ռուսթավելիի պողոտայում կենտրոնացված ոստիկանական ստորաբաժանումները, սակայն, լուսադեմին ցրել են խորհրդարանի մուտքերն արգելափակած ցուցարարների հավաքը: Ակցիան ցրելու համար ոստիկաններն օգտագործել են ջրցան մեքենա: Այս պահին խորհրդարանի բոլոր մուտքերը հսկում են հատուկ ջոկատայինները:
Վրաստանի ՆԳ նախարարության տվյալներով ակցիան ցրելու ժամանակ վիրավորվել է 3, ձերբակալվել` 28 մասնակից: Նշվում է, որ վիրավորները համապատասխան օգնություն են ստանում բուժհաստատություններում: ՆԳ նախարարությունը հայտարարել է, որ ցուցարարները ձերբակալվել են իրավապահ մարմինների աշխատակիցներին անհնազանդություն ցուցաբերելու և խուլիգանության հոդվածներով:
Ընդդիմությունը հայտարարել է, որ արգելափակման ակցիան շարունակելու է: Խորհրդարանի լիագումար նիստը նշանակված է ժամը 12-ին:
Այս պահին իրավիճակը շարունակում է լարված մնալ։
Հիշեցնենք, որ Վրաստանում տեղի են ունենում բողոքի ակցիաներ՝ արտահերթ ընտրություններ անցկացնելու պահանջով։ Զանգվածային ցույցերը բռնկվել են այն բանից հետո, երբ Վրաստանի խորհրդարանում չի հաստատվել համամասնական ընտրակարգին անցնելու՝ սահմանադրական փոփոխությունների նախագիծը։
Հետևեք մեզ տելեգրամում
