Թուրքիայի ռազմածովային ուժերի 103 պաշտոնաթող ծովակալ դատապարտել են իշխող «Արդարություն և զարգացում կուսակցությանը»՝ «Մոնտրոյի կոնվենցիան քննարկման համար բացելու» և բանակն իսլամացնելու համար:
«Անհանգստություն է առաջացնում այն փաստը, որ Մոնտրոյի Կոնվենցիան բաց է քննարկման համար ինչպես Ստամբուլի ջրանցքի շրջանակում, և այնպես էլ նրա, թե ով իրավունք ունի չեղարկել միջազգային պայմանագրերը»,-ասված է ծովակալների հայտարարության մեջ:
Մոնտրոյի կոնվենցիան ստորագրվել է 1936 թվականին Շվեյցարիայում: Այն Թուրքիային իրավունք տվեց վերահսկել իր երկու նեղուցները՝ Բոսֆորը և Դարդանելը՝ սահմանափակելով ռազմական նավերի անցումը նեղուցներով միայն Սև ծովին սահմանակից պետություններին:
Ծովակալները կոնվենցիան անվանել են «դիվանագիտական խոշոր հաղթանակ, որով ավարտվել է Լոզանի խաղաղության պայմանագիրը, որը 1923թ. սահմանել էր ժամանակակից Թուրքիայի սահմանների մեծ մասը, և հայտարարել են, որ թուրքական նեղուցները «աշխարհում ամենակարևոր ծովային ուղիներից մեկն են»: Զինվորականների խոսքով, կոնվենցիան Թուրքիայի թույլ էր տվել չեզոք մնալ Երկրորդ համաշխարհային պատերազմի տարիներին և ընդանուր առմամբ խաղաղություն է ապահովում Սև ծովում:
Պաշտոնաթող զինվորականներն անդրադարձել են նաև բանակի իսլամացման գործոնին:
«Թուրքիայի զինված ուժերը (TAF) և մեր նավատորմը դիտմամբ հարձակման են ենթարկվել (իսլամական քարոզիչ) Ֆեթուլլահ Գյուլենի շարժման կողմից, և այդ դավաճանական դավադրության պատճառով շատ արժեքավոր կադրեր ենք կորցրել»,- շարունակել են ծովակալները:
«Այս դեպքերից քաղված ամենակարևոր դասն այն է, որ TAF-ը պետք է մանրակրկիտ պաշտպանի սահմանադրության անփոփոխ հիմնարար արժեքները»,-ասել են ծովակալները՝ նկատի ունենալով Սահմանադրության այն հոդվածը, որով Թուրքիան սահմանվում է որպես աշխարհիկ, ժողովրդավարական պետություն է՝ օրենքի գերակայությամբ:
Այս համատեղ հռչակագրից հետո ծովակալների նկատմամբ հետաքննություն է սկսվել, որի շրջանակում ձերբակալել են 10 հոգու:
Հետևեք մեզ տելեգրամում
