Ֆրանսիայի արտաքին գործերի նախարար Ժան Իվ Լե Դրիանը ՀՀ ԱԳ նախարարի պաշտոնակատար Արա Այվազյանի և Ադրբեջանի ԱԳ նախարար Ջեյհուն Բայրամովի հետ հեռախոսազրույցների ժամանակ Բաքվին և Երևանին կոչ է արել համաձայնության գալ Հայաստանի տարածքից ադրբեջանական զորքերի դուրսբերման շուրջ:
«Հայաստանի և Ադրբեջանի սահմանին ծագած վերջին լարվածության հետ կապված՝ Ժան Իվ Լե Դրիանը հիշեցրել է Ֆրանսիայի խորը մտահոգությունն ու հավատարմությունը Հայաստանի տարածքային ամբողջականության պահպանմանը: Ֆրանսիան ուշադիր հետևում է իրավիճակին ու կողմերին կոչ անում շարունակել երկխոսությունը՝ Հայաստանի տարածքից ադրբեջանական ուժերի անհապաղ դուրս բերումն ապահովելու նպատակով»,-ասված է Ֆրանսիայի ԱԳՆ-ի տարածած հաղորդագրության մեջ:
«Ինչ վերաբերում է այն հարցերին, որոնք դեռևս լուծված չեն նոյեմբերի 9-ի հրադադարի մասին համաձայնագրի կնքումից հետո, Ֆրանսիան կրկնում է ԵԱՀԿ Մինսկի խմբի համանախագահների հովանու ներքո կողմերի միջև բարձր մակարդակի ուղիղ երկխոսության իր կոչը՝ տարածաշրջանում անվտանգությունն ու կայուն խաղաղությունը երաշխավորելու վերաբերյալ բոլոր հարցերը քննարկելու համար»,- հավելել են Ֆրանսիայի ԱԳՆ-ից:
Հետևեք մեզ տելեգրամում
