Իրանի ճանապարհների և քաղաքաշինության նախարար Մոհամմադ Էսլամին Հայաստան այցի ավարտին այցելել է Նորդուզի անցակետ: Էսլամին նշել է, որ Երևան այցի ընթացքում քննարկվել է առևտրաշրջանառության ծավալները 1 մլրդ դոլարի հասցնելու հարցը, ստորագրվել է 3 հուշագիր:
Նախարարը նշել է, որ Հայաստանը վերակառուցում և ընդլայնում է իր ենթակառուցվածքները և շահագրգիռ է, որպեսզի այդ գործընթացին մասնակցի նաև իրանական կողմը: Նա նշել է, որ ստեղծվել է համատեղ կոմիտե, որը զբաղվելու է ճանապարհների, երկաթուղու, կամուրջների, թունելների կառուցման համար ինժեներական ծառայությունների արտահանման և ներդրումների գրավման հարցերով:
Էսլամիի խոսքերով՝ ստորագրվել է նաև հուշագիր ճանաապարհային տուրքերը նվազեցնելու վերաբերյալ: Քննարկվել է նաև Թավրիզ-Ջոլֆա-Նախիջևան-Երևան-Թբիլիսի երթուղու գործարկման հարցը, այդ առնչությամբ ստորագրվել է նաև հուշագիր:
Իրանցի նախարարը նաև նշել է, որ պայմանավորվածություն է ձեռք բերվել ներդրումներ իրականացնել «Մեղրի ազատ տնտեսական գոտում», կառուցել արդյունաբերական ավաններ: Ըստ պաշտոնյայի՝ Իրանը կարող է օգտվել այն հնարավորությունից, որ Հայաստանը Եվրոպայի հետ որոշ ապրանքների դեպքում արտոնյալ սակագներով է առևտուր անում:
Էսլամին նաև հայտնել է, որ Սյունիքի մարզպետի հետ հանդիպմանը մարզպետը Սյունիքում ներդրումների կոչ է արել: Իրանի ճանապարհային բեռնափոխադրումների կազմակերպության ղեկավարն իր հերթին հայտարարել է, որ մաքսատուրքերի վերացման շուրջ հուշագիր է ստորագրվելու: Նա նշել է, որ Իրանի տարածք մուտք գործող հայկական բեռնատարները պետք է համապատասխանեն միջազգային ստանդարտներին:
Հետևեք մեզ տելեգրամում
