Նոյեմբերի 18-ին Վրաստանում առաջին անգամ մեկնարկել են Maple Arch-2021 բազմազգ հրամանատարաշտաբային զորավարժությունները՝ Կանադայի, Լիտվայի, Լեհաստանի, Թուրքիայի և Ուկրաինայի զինծառայողների մասնակցությամբ։ Այս մասին հայտնում են հանրապետության ՊՆ մամուլի ծառայությունից։
«Զորավարժությունների կազմակերպիչը Կանադայի պաշտպանության նախարարության ռազմական վարժանքների տնօրինությունն է, իսկ վրացական կողմից դրանք ղեկավարում է Պաշտպանության ուժերի արևելյան հրամանատարությունը։ Զորավարժություններին մասնակցում են զինծառայողներ Վրաստանից, Կանադայից, Լիտվայից, Լեհաստանից, Թուրքիայից և Ուկրաինայից»,- ասվում է հաղորդագրության մեջ։
Նշվում է, որ զորավարժությունների նպատակը մասնակից երկրների զինված ուժերի համատեղելիության բարձրացումն է, պաշտպանության ոլորտում կապերի խորացումը, խաղաղապահ գործողությունների պլանավորման և իրականացման գործում ՆԱՏՕ-ի չափանիշներին էլ ավելի մոտեցումը և արդյունավետ որոշումներ կայացնելու հմտությունների կիրառումը, հավելել են Վրաստանի պաշտպանության նախարարությունում:
Երկշաբաթյա զորավարժությունները տեղի կունենան Վրաստան-ՆԱՏՕ Վարժանքների և գնահատման համատեղ կենտրոնում (JTEC): Կանադացի հրահանգիչների հետ միասին դրանց մասնակցում են վրացի գործընկերները։ Maple Arch-ն ամեն տարի անցկացվում է տարբեր երկրներում։ Վրաստանը դրանց մասնակցում է 2018 թվականից։
Հետևեք մեզ տելեգրամում
