Թուրքիայում իշխող կոալիցիայի առաջնորդների՝ Ռ.Թ. Էրդողանի և Դ. Բահչելիի՝ թյուրքական աշխարհի քարտեզի ֆոնին արված լուսանկարը բացահայտ կերպով ի ցույց է դնում «Զանգեզուրի միջանցք» թուրք-ադրբեջանական նախագծի աշխարհաքաղաքական կարևորությունը թյուրքական աշխարհի և մարտահրավերներն ամբողջ աշխարհի համար։
Պանթյուրիստական գաղափարախոսության առարկայացման բարձրակետ համարվող վերոնշյալ քարտեզը հստակ ուրվագծում է այն բոլոր երկրներն ու ուղղությունները, որոնց հարցում տարիներ շարունակ Անկարան նպատակային քաղաքականություն է վարել, իսկ ապագայում առավել ակտիվորեն է իրականացնելու՝ ներկա աշխարհակարգի պայմաններում «Մեծ Թուրանի» կամ «Թյուրքական բևեռի» ծրագիրը կենսագործելու նպատակով։
Քարտեզն ընդգրկում է տարածքներ Բալկանյան թերակղզուց, Ռուսաստանից, Իրանից, Չինաստանից, Մոնղոլիայից, հատվածներ Սիրիայից, Իրաքից, ներառում է թյուրքախոս երկրներին (Ադրբեջան, Ղազախստան, Ղրղզստան, Ուզբեկստան)։ Եվ որ ամենակարևորն է՝ ծրագրի բանալին այսօր Հայաստանի Սյունիքի մարզում է՝ ենթադրյալ «Զանգեզուրի միջանցքը», որը կոչված է ապահովելու անխափան կապը ծրագրի բոլոր հատվածների միջև։
Վերոնշյալի համատեքստում, գլխավոր հարցն այն է, թե պատերազմից թուլացած Հայաստանն արդյո՞ք ի զորու է միայնակ կասեցնել թյուրքական հեռանկարային ռազմավարական ծրագիրը, որը սպառնում է ոչ միայն առանձին երկրների տարածքային ամբողջականությանը, միաժամանակ մի քանի տարածաշրջաններում պետությունների սահմանների անխախտելիությանը, այլև ամբողջ աշխարհի անվտանգությանն ու կայունությանը։
Հետևեք մեզ տելեգրամում
