Նոյեմբերի 24-ին Իսրայելը և Մարոկկոն փոխըմբռնման հուշագիր են ստորագրել ռազմական և անվտանգային համագործակցության ոլորտում՝ Իսրայելի պաշտպանության նախարար Բենի Գանցի՝ Ռաբաթ կատարած պաշտոնական այցի շրջանակներում, հայտնում է The Times of Israel-ը։
Կայքի հաղորդմամբ՝ համաձայնագիրը նախանշում է անվտանգային ու ռազմական համագործակցությունն Իսրայելի և Մարոկկոյի միջև «իր բոլոր դրսևորումներով»՝ «տարածաշրջանում առկա սպառնալիքներին և մարտահրավերներին» դիմակայելու համար։ Համաձայնագիրը նաև թույլ կտա Մարոկկոյին ավելի դյուրին ճանապարհով ձեռք բերել իսրայելական անվտանգության բարձր տեխնոլոգիական սարքավորումներ, այդ թվում օպերատիվ պլանավորման, հետազոտությունների ու զարգացման ոլորտում երկկողմ համագործակցության։
«Այս համաձայնագիրը շատ կարևոր քայլ է, որը մեզ հնարավորություն կտա կարծիքներ փոխանակել, համատեղ նախագծեր սկսել և խթանել իսրայելական արտահանումը դեպի Մարոկկո»,- նշել է Իսրայելի պաշտպանության նախարար Գանցը։
Գանցի խոսքով՝ այս համաձայնագիրն «աննախադեպ» է Իսրայելի համար։ Թեև Իսրայելը մի քանի անվտանգության հուշագրեր ունի դաշնակից երկրների հետ, սակայն, նրա խոսքով, Մարոկկոյի հետ գործարքն իր տեսակի մեջ առաջինն է արաբական երկրների մեծ մասի հետ:
Նշենք, որ Իսրայելը և Մարոկկոն կարգավորել են երկկողմ հարաբերություններն «Աբրահամյան արձանագրությունների» շրջանակում 2020 թվականի դեկտեմբերին: Իսկ ընթացիկ տարվա օգոստոսին Իսրայելի ԱԳ ղեկավար Յաիր Լապիդն այցելել էր Մարոկկո և մասնակցել Ռաբաթում Իսրայելի դեսպանատան բացման արարողությանը։
Հետևեք մեզ տելեգրամում
