«Իսրայելում ստեղծված ներքաղաքական ճգնաժամի գլխավոր պատճառը մարդկային և անձնային գործոնն է»,- այս մասին «RegionMonitor»-ի հետ զրույցում նշեց արևելագետ Արմեն Պետրոսյանը՝ մեկնաբանելով այդ երկրում տեղի ունեցած արտահերթ խորհրդարանական ընտրություններից հետո ստեղծված իրավիճակը։
Փորձագետի կարծիքով՝ ինչպես ապրիլին կայացած, այնպես էլ այս ընտրություններից հետո որևէ քաղաքական ուժի չհաջողվեց էական առավելություն արձանագրել մրցակիցների նկատմամբ։ Ավելին, իշխող աջակողմյան ճամբարի և ընդդիմադիր ձախ-կենտրոնամետ ուժերի միջև հարաբերակցությունը ևս չնչին է․ նրանցից որևէ մեկն անհրաժեշտ 61 մանդատ չի ձեռք բերել և չի կարողանում պարզ մեծամասնություն կազմել նորընտիր խորհրդարանում։ Եվ չնայած Իսրայելի նախագահ Ռ․ Ռիվլինի ջանքերին՝ միտված ազգային միասնության կառավարություն կազմելուն, որը ստեղծված իրավիճակում, թերևս, նոր ընտրություններից խուսափելու միակ իրատեսական տարբերակն է, այդուհանդերձ, ակնհայտ է, որ առկա խնդիրների համատեքստում հազիվ թե հնարավոր լինի։
Անդրադառնալով ներքաղաքական ճգնաժամի պատճառներին՝ Պետրոսյանը նշեց․ «Ստեղծված իրավիճակի առանցքային պատճառն մարդկային գործոնն է՝ պայմանավորված հատկապես վարչապետ Բենյամին Նեթանյահուի և նախկին Պնախարար Ավիգդոր Լիբերմանի անձերով։ Իսրայելական հասարակության մի ստվար հատված, կարծես թե, ձանձրացել է ավելի քան 1 տասնամյակ անընդհատ կառավարող Նեթանյահուից՝ հատկապես նրա հետ կապված քրեական գործերի առկայության պայմաններում։ Ի դեպ, վերջին հանգամանքը լուրջ պատճառ է նաև ընդդիմադիր ուժերի համար՝ Նեթանյահուի հետ համագործակցելուց հրաժարվելու համար, քանի որ նրանց անցկացրած նախընտրական պայքարում կենտրոնական տեղ է զբաղեցրել վարչապետի անձի դեմ արշավը։ Իսկ Լիբերմանի բացասական դերակատարումը պայմանավորված է նրա կողմից որևԷ ճամբարի չմիանալու հանգամանքով, և նրա կուսակցության ստացած 8 մանդատները, կարծես, որոշիչ դեր են ստացել կոալիցիոն կառավարության ձևավորման գործում»։
Նշելով ճգնաժամի հաղթահարման հնարավոր ուղիների մասին՝ փորձագետը նկատեց․ «Ամենաիրական տարբերակը Նեթանյահուհի փոխարեն իշխող «Լիքուդ» կուսակցության կողմից նոր թեկնածուի առաջադրումն է, որը կարող է հնարավոր լինել, երբ նախագահի կողմից նոր կառավարության ձևավորման մանդատը հերթական անգամ ստացած վարչապետի ձախողումից հետո նախաձեռնվեն կառավարության ձևավորման նոր փորձեր»։
Հետևեք մեզ տելեգրամում
