Իրաքի վարչապետի պաշտոնը զբաղեցնելու ամենահավանական թեկնածուն Մուհամմադ Ջաֆար Ալ-Սադրն է՝ Իրաքի շիա առաջնորդ Մուկթադա Ալ-Սադրի զարմիկը: Տեղեկությունը փոխանցում է RUDAW լրատվամիջոցը:
Լրատվամիջոցի տեղեկություններով՝ նրա թեկնածությանն աջակցում է Մուկթադա Ալ-Սադրը, ում գլխավորած «Ալ-Սադր» քաղաքական ուժը հաղթել էր Իրաքի ընտրություններում՝ խորհրդարանում զբաղեցնելով 72 պատգամավորական մանդատ:
Հաղորդվում է, որ Մուհամմադ Ալ-Սադրը նախկինում որոշ ժամանակ աշխատել է արտաքին գործերի նախարարությունում, իսկ 2010 թվականին խորհրդարանում պատգամավոր է ընտրվել «Օրենքի երկիր» դաշինքի կողմից, թեև մի քանի ամիս անց հրաժարական է տվել։
Համաձայն լրատվամիջոցի՝ նա առնչություն չունի քաղաքական կուսակցությունների հետ և կարծում է, որ Իրաքը պետք է հավասարակշռված քաղաքականություն վարի ԱՄՆ-ի և իր հարևան երկրների հետ:
Մուհամմադ Ալ-Սադրը մերժում է կոնսենսուսային կառավարություն ձևավորելու գաղափարը և առաջ է քաշում ազգային մեծամասնական կառավարության մոդելը՝ իր զարմիկի գլխավորությամբ:
Նշենք, որ «Ալ-Սադր» կոալիցիան դաշնակցում է «Քուրդիստանի դեմոկրատական կուսակցության» հետ՝ առաջ մղելով ազգային մեծամասնական կառավարության ձևավորումը, մինչդեռ այս գաղափարին դեմ են շիայական քաղաքական ուժերը:
Հետևեք մեզ տելեգրամում
