Իրանի արտգործնախարար Հոսեյն Ամիր Աբդոլլահիանը հայտարարել է, որ Թեհրանի և Աբու Դաբիի միջև հարաբերություններում նոր էջ է բացվել: Այս մասին նա գրառում է կատարել Twitter-ի իր միկրոբլոգում:
Իրանի ԱԳ նախարար Աբդոլլահիանը երկուշաբթի այցելել էր Աբու Դաբի՝ ԱՄԷ-ի նախագահ շեյխ Խալիֆա բըն Զայեդ Ալ-Նահյանի մահվան կապակցությամբ ցավակցություն հայտնելու: Այցի շրջանակում Աբդոլլահիանը հանդիպել է ԱՄԷ նորընտիր նախագահ շեյխ Մուհամմադ բըն Զայեդ Ալ-Նահյանի հետ:
Իրանի արտգործնախարարը ողջունել է շեյխ Մուհամմադ բըն Զայեդին՝ նախագահ ընտրվելու կապակցությամբ՝ հայտարարելով, որ «Իրանի Իսլամական Հանրապետության և Արաբական Միացյալ Էմիրությունների հարաբերություններում նոր էջ է բացվել»:
Reuters-ը նշել է, որ հունվարին Աբու Դաբիի վրա հուսիների իրականացրած հարձակումից հետո Աբդոլլահիանն իրանցի ամենաբարձրաստիճան պաշտոնյան է, ով այցելել է ԱՄԷ:
Ավելի վաղ՝ նոյեմբերին Իրանի փոխարտգործնախարար Ալի Բաղերի Քանին այցելել էր ԱՄԷ, որտեղ հայտարարել էր, որ երկու երկրները համաձայնության են եկել նոր շրջափուլ բացել երկկողմ հարաբերություններում:
Հետևեք մեզ տելեգրամում
