Երևանում գտնվող Իրանի Իսլամական Հանրապետության արտաքին գործերի նախարար Աբբաս Արաղչին, անդրադառնալով տարածաշրջանում ամերիկյան ուժերի հնարավոր ներկայությանը և TRIPP նախագծին, հայտարարել է, որ Թեհրանը մտահոգություններ և զգայունություն ունի իր անմիջական հարևանությամբ ԱՄՆ-ի ցանկացած ներկայության նկատմամբ։ Այս մասին հայկական ԶԼՄ-ներին հղումով հայտնում է իրանական Tasnim լրատվական գործակալությունը։
Միևնույն ժամանակ, Իրանի արտգործնախարարն ընդգծել է, որ այդ հարցի շուրջ մշտական երկխոսության մեջ են հայկական կողմի հետ։
«Մենք մտահոգություն և զգայունություն ունենք մեր տարածաշրջանում և հարևանությամբ ԱՄՆ-ի ցանկացած ներկայության նկատմամբ, սակայն այս հարցով անմիջական կապի մեջ ենք մեր հայ բարեկամների հետ և գիտենք, որ նրանք որևէ քայլ չեն ձեռնարկի Իրանի անվտանգության դեմ։ Մենք շարունակելու ենք մեր խորհրդակցությունները Հայաստանի իշխանությունների հետ»,- նշել է Արաղչին։
Իրանցի դիվանագետը հավելել է, որ երկու երկրների միջև բարձր մակարդակի քաղաքական երկխոսությունն ու խորհրդակցություններն ունեն շարունակական բնույթ․
«Իմ լավ ընկեր Արարատ Միրզոյանը այցելեց Թեհրան, և մենք լավ խորհրդակցություններ ունեցանք միմյանց հետ. այսօր էլ նախագահ Փեզեշքիանը կհանդիպի Հայաստանի վարչապետի հետ»,- եզրափակել է Իրանի ԱԳ նախարարը։
Հետևեք մեզ տելեգրամում
