Իրաքի խորհրդարանի խոսնակ Մուհամմադ Հալբուսին ողջունել է վարչապետի լիազորություններն իրականացնող Մուստաֆա Կազեմիի նախաձեռնությունը՝ կողմերին հրավիրելու բանակցային սեղան՝ երկրում ընթացող վերջին զարգացումներն ու իրադարձությունները քննարկելու համար: Տեղեկությունը փոխանցում է իրաքյան պետական INA լրատվամիջոցը:
Երկուշաբթի Իրաքի անվտանգության ուժերը երկրի մայրաքաղաքում բարձր պատրաստվածության վիճակի էին բերվել, քանի որ շիաների միջև լարվածությունը շարունակում է մեծանալ: Հակասությունը շիա ազդեցիկ հոգևորական Մուկթադա Ալ-Սադրի կողմնակիցների և շիաների «Կոորդինացիոն շրջանակի» (ովքեր աջակցություն են ստանում Իրանից) միջև է:
Նշենք, որ Իրաքում տիրում է քաղաքական աննախադեպ ճգնաժամ, քանի որ ընտրությունների անցկացումից գրեթե 10 ամիս անց երկրում կառավարություն դեռևս չի ձևավորվել:
Երեկ Ալ-Սադրի մեծաթիվ կողմնակիցներ ներխուժել էին Իրաքի խորհրդարանի շենք և հայտարարել բաց նստացույց, մինչև որ նրանք, ում որակել էին «կոռումպացված», կարտաքսվեն:
Իսկ «Կոորդինացիոն շրջանակի» կողմնակիցները ևս ցույց են անցկացրել Բաղդադում և փորձել ներխուժել Կանաչ գոտի (որտեղ գտնվում է Իրաքի խորհրդարանի շենքը, օտարերկրյա դեսպանատներ և կառավարական շենքեր):
Հետևեք մեզ տելեգրամում
