Ընդամենը 3 օրից մեկնարկելու են Ֆուտբոլի Աշխարհի առաջնության խաղերը: Ֆուտբոլային հավաքականները և երկրպագուները արդեն սկսել են ժամանել Կատար:
Ինչպես տեղեկացնում է Aljazeera-ն, ֆուտբոլային հանդիպումներն անցկացվելու են Կատարի 8 մարզադաշտերում: Ուշագրավ է, որ 8 մարզադաշտերից 7-ը կառուցվել են Աշխարհի առաջնության համար: Օրինակ՝ ամենամեծ «Lusail » մարզադաշտը կարող է տեղավորել շուրջ 80 հազար երկրպագու:Հենց այստեղ էլ կայանալու է եզրափակիչ հանդիպումը:
Նշենք, որ Ալ-Բիդա այգում տեղադրվել է հսկայական էկրան՝ Աշխարհի գավաթի խաղերի ցուցադրության համար: Այգում խաղերը կարող է դիտել 40 հազար երկրպագու:
Երկրպագուների համար ստեղծվել են նաև սննդի կորտեր, մշակութային ցուցանմուշներ և ՖԻՖԱ-ի թանգարան:
Բացի այդ, Կատարը անվտանգության տասնյակ հազարավոր աշխատակիցներ է տեղակայել երկրպագուների անվտանգությունն ապահովելու համար: Բարելավվել է նաև հանրային տրանսպորտը: Իսկ Hayya քարտ ունեցող երկրպագուների համար հասարակական տրանսպորտը լինելու է անվճար նոյեմբերի 10-ից դեկտեմբերի 23-ն ընկած ժամանակահատվածում: Hayya քարտը երկրպագուների ID քարտն է, որը թույլ է տալիս մուտք գործել Կատար և մարզադաշտեր:
Հիշեցնենք՝ նախատեսվում է, որ ավելի քան 1,2 միլիոն երկրպագու է այցելելու Կատար: Նոյեմբերի 20-ին մեկնարկելու է աշխարհի առաջնությունը, որը տևելու է մինչև դեկտեմբերի 17-ը: Առաջին ֆուտբոլային հանդիպումը կայանալու է Կատարի և Էկվադորի հավաքականների միջև նոյեմբերի 20-ին:
Ավելի վաղ տեղեկացրել էինք, թե ինչպիսի կանոնների պետք է հետևեն երկրպագուները Կատար այցելելուց առաջ:
Հետևեք մեզ տելեգրամում
