Իրանական տարբեր լրատվական-վերլուծական գործակալություններ շարունակում են անդրադառնալ Ադրբեջանի կողմից Լաչինի միջանցքի արգելափակմանը, ինչպես նաև դրանից բխող հետևանքներին։
Region Monitor-ը ներկայացնում է, թե իրանական վերլուծական դաշտում ինչպիսի շեշտադրումներ են տեղ գտել Ադրբեջանի նման վարքագծի պատճառների և հետապնդած նպատակների վերաբերյալ։
Իրանական ԶԼՄ-ները շեշտել են, որ Ադրբեջանի կողմից Լաչինի միջանցքի շրջափակումը կապ ունի «Զանգեզուրի միջանցքի» բացման հետ։ Ըստ ԶԼՄ-ների՝ դա կհանգեցնի Հայաստանի մեկուսացմանը, կսպառնա նրա տարածքային ամբողջականությանը և կփակվի Իրանի հետ ռազմավարական սահմանը։
Իրանական մեդիայում տարածվում է նաև այն թեզը, որ Թեհրանն անհրաժեշտ ռազմական, պաշտպանական, անվտանգային և հետախուզական կարողություն ունի, որպեսզի անփոփոխ պահի հայ-իրանական սահմանները։ Այս համատեքստում Ալիևի հայտարարությունները անարժեք են, և ընդհամենը քաղաքական հռետորաբանություն՝ Ադրբեջանի ժողովրդի և հասարակական կարծիքի մեջ իր իմիջն ամրապնդելու համար։
Թեմային անդրադարձել է նաև իրանցի փորձագետ Էհսան Մովահեդիանը։ Նրա խոսքով՝ Ալիևի ամանորյա ելույթում «Զանգեզուրի կեղծ» միջանցքի ստեղծման մասին հայտարարությունը լուրջ մարտահրավեր կարող է լինել Իրանի համար թե՛ անվտանգության և ազգային շահերի, թե՛ աշխահրաքաղաքական տեսանկյունից։
Փորձագետն ավելացրել է, որ Բաքվի նկատմամբ ԻԻՀ-ի զսպող ուժն այնքան բարձր է, որ Թեհրանը նույնիսկ իր ամենաթույլ ռազմական և պաշտպանական վիճակում կարող է հեշտությամբ կանխել Ալիևի և Էրդողանի պատրանքային միջանցքի ստեղծումը։
Իսկ իրանցի որոշ փորձագետների և նախկին դիվանագետների կարծիքով՝ Հարավային Կովկասում տեղի ունեցող զարգացումները կապված են նաև Իրանի ներքին զարգացումների հետ։ Իրանի թյուրքախոս շրջաններում Անկարայի և Բաքվի աջակցությամբ տարածվում է անջատողական գաղափարներ: Իրանը անհանգստացած է, որ Թուրքիայի ազդեցության ընդլայնումը իր հյուսիսային սահմաններում ապագայում կանդրադառնա իր ներքին քաղաքականության վրա, քանի որ Ադրբեջանը բացահայտորեն հայտարարել է «Հարավային Ադրբեջանը (Հյուսիսային Իրան) Ադրբեջանի Հանրապետությանը միանալու նպատակի մասին»։
Հետևեք մեզ տելեգրամում
