Աշխարհաքաղաքական և տարածաշրջանային լարվածության ֆոնին տարածաշրջանում ընթանում են ակտիվ դիվանագիտական բանակցություններ։ Տպավորություն է՝ ինչ-որ նոր նախաձեռնության կամ դիրքավորման ընդառաջ՝ «սլաքները ճշգրտելուն» միտված քայլեր են իրականցվում: Այս մասին Facebook-ի իր միկրոբլոգում գրել է տարածաշրջանային հարցերով փորձագետ Արմեն Պետրոսյանը:
Պետրոսյանը նկատել է, որ ընդամենը մի քանի օրվա ընթացքում տեղի են ունենում Ադրբեջան-Թուրքիա, Ռուսաստան-Ադրբեջան, նախատեսվում են Իրան-Ռուսաստան, Հայաստան-Իրան, Հայաստան-Գերմանիա/ԵՄ բարձր մակարդակի այցելություններ/բանակցություններ։
Փորձագետի համոզմամբ՝ ընթացող բանակցություն-քննարկումներում առանցքային տեղ ունի տարածաշրջանային աշխարհաքաղաքականությունը, որը որոշակիորեն խախտվել է Հայաստանում ԵՄ քաղաքացիական առաքելության գործարկմամբ։
«Այս համատեքստում արտատարածաշրջանային դերակատարների քաղաքական ակտիվությանը դեմ տարածաշրջանային առանցքային խաղացողների համար օրակարգային խնդիր է երկկողմ կամ բազմակողմ ձևաչափերի նախաձեռմամբ կանխել Արևմուտքի հետագա ակտիվացման փորձերը»,- գրել է Պետրոսյանը:
Պետրոսյանը շեշտել է, որ միասնական քաղաքական դիրքավորմանը խոչընդոտում է տարածաշրջանում առկա ոչ միանշանակ հարաբերությունների իրողությունը՝ Հայաստան-Ռուսաստան, Հայաստան-Թուրքիա, Իրան-Ադրբեջան, Իրան-Թուրքիա, Վրաստան-Ռուսաստան։
Փորձագետը հիշեցրել է «3+3» ձևաչափը, որն այդպես էլ լիարժեք կերպով «միս ու արյուն» չստացավ: Այս ձևաչափի վերսկսման հարցում զգալի դերակատարում է վերապահված Վրաստանից, բայց հատկապես Հայաստանից։
Պետրոսյանը նկատել է, որ հենց Երևանի դրական դիրքորոշման արդյունքում դեռևս 2021թ. դեկտեմբերին տրվեց ձևաչափի մեկնարկը։ Մինչդեռ անցած 1 տարվա ընթացքում խորքային փոփոխություններ են արձանագրվել նաև մեր տարածաշրջանում, որը սկզբունորեն ազդել է նաև Հայաստանի արտաքին քաղաքականության վրա։
««3+3»-ի ձախողման դեպքում ականատես ենք լինելու մի քանի փոքր բանաձևումների միջոցով առանձին տարածաշրջանային շահերի առաջմղման իրողության՝ հետևյալ հիմնական ձևաչափերով՝ Ռուսաստան-Ադրբեջան-Թուրքիա, Ռուսաստան-Իրան, Թուրքիա-Ադրբեջան, Իրան-Հայաստան»,- եզրափակել է Պետրոսյանը:
Հետևեք մեզ տելեգրամում
