ԱՄԷ-ի, Եգիպտոսի, Սաուդյան Արաբիայի, Իսրայելի, Սիրիայի հետ հարաբերությունները կարգավորելու Թուրքիայի փորձերը միտված են առավելապես Թուրքիայի տնտեսական վիճակի կայունացմանը: Այս մասին Ermenihaber-ի հետ զրույցում նշել է ակադեմիկոս, թուրքագետ Ռուբեն Սաֆրաստյանը։
Պետք է նշել, որ այս իրողությունն արձանագրվել էր դեռևս նախքան երկրաշարժը: Ստեղծված խնդրահարույց իրավիճակում արաբական հարուստ երկրներից կապիտալ ստանալը, ներդրումներ ստանալը Թուրքիայի համար կարևոր է, և դրանց մի մասն Էրդողանը պատրաստվում է ուղղել դեպի նախընտրական քարոզարշավ: Բացի դրանից, կարծում եմ, որ կա նաև մեկ այլ հանգամանք: Թուրքիան և մասնավորապես Էրդողանն ձգտում է իր հարաբերությունները կարգավորել նշված երկրների հետ՝ նպատակ հետապնդելով դուրս գալ տարածաշրջանային մակարդակից, անցում կատարելով համամոլորակային շրջանակի: Այդ նպատակով իր համար կարևոր է տարածաշրջանային երկրների հետ հարաբերությունների կարգավորումը, որպեսզի իր ձեռքերն ավելի երկարեն:
Հայտնի է Էրդողանի՝ «Աշխարհն ավելի մեծ է, քան հինգը» ձևակերպումը, որի հիման վրա գիրք է հրատարակվել: Այսինքն, Թուրքիան ցանկանում է ավելի մեծամասշտաբ քաղաքականություն իրականացնել քան իր ռեսուրսներն են բավարարում: Թուրքիան, ընդհանուր առմամբ, տարածաշրջանային պետություն է և ունի գերտերության համար սակավ ռեսուրսներ, սակայն Էրդողանը փորձում է իրականացնել բազմավեկտոր քաղաքականություն՝ Աֆրիկայից մինչև Կենտրոնական Ասիա:
Սա է պատճառը, որ Էրդողանը ցանկանում է կարգավորել հարաբերությունները տարածաշրջանային երկրների հետ, որպեսզի որևէ խոչընդոտ չլինի ռազմավարական իր այդ նպատակի ճանապարհին: Այս համատեքստում պետք է դիտարկել նաև Հայաստանի հետ հարաբերությունների կարգավորման գործընթացը։
Հետևեք մեզ տելեգրամում
