Ռազմական սադրանքների միջոցով Ադրբեջանի առանցքային նպատակը կարճաժամկետ հեռանկարում Հայաստանի հետ բանակցությունների գործընթացի տապալումն է։ Նման տեսակետ է հայտնել տարածաշրջանային հարցերով փորձագետ Արմեն Պետրոսյանը:
Փորձագետի խոսքով՝ Թուրքիայում ընտրական գործընթացի պատճառով առաջացած ժամանակային պատուհանը հատկապես Արևմուտքի կողմից օգտագործվում է Ադրբեջան-Հայաստան կարգավորման գործընթացում Բաքվին փոխզիջումների մղելու հարցում արդյունավետ ճնշում գործադրելու նպատակով։
Պետրոսյանը հավելել է, որ նման պայմաններում Ադրբեջանի (գուցե նաև թուրք-ադրբեջանական) մարտավարությունը լիովին կանխատեսելի է՝ հնարավորինս ձգձգել բարձր մակարդակի բանակցությունները։
«Այդ նպատակով նկատելի են հետևյալ մարտավարական քայլերը՝
1. Առավելագույնս շահել Արևմուտքի վստահությունը տարածաշրջանային զարգացումներում։ Այդ նպատակով Բաքուն ավելի է ամրապնդում իր դիրքերը հակաիրանական ճակատում, զուգահեռաբար ապատեղեկատվություն տարածելով Երևան-Թեհրան մտացածին ռազմական համագործակցության վերաբերյալ։ Բացի այդ, հակառուսական ուղեգծում Ի. Ալիևը յուրօրինակ ժեստ արեց՝ չմասնակցելով Մոսկվայում Հայրենական պատերազմում հաղթանակի հերթական տոնակատարություններին։
2. Ադրբեջանը ռազմական լարվածություն է սադրում Հայաստանի դեմ՝ նպատակ ունենալով Երևանին դրդել՝ հրաժարվելու առաջիկա առնվազն 3 բանակցային շրջափուլերից»,- Facebook-ի էջում գրել է Արմեն Պետրոսյանը:
Փորձագետը շեշտել է, որ Բաքվի սադրանքներին պետք է վերաբերվել սառնասրտորեն՝ հաշվարկելով բոլոր հնարավոր սցենարները։ Նա նաև անդրադարձել է Թուրքիայի ընտրությունների գործոնին: Պետրոսյանի համոզմամբ՝ ընտրություններն ընթանալու են 1 փուլով՝ պայմանավորված վարկանիշով 3-րդ թեկանծուի՝ Մ. Ինջեի՝ ընտրական գործընթացից դուրս գալու հանգամանքով:
Հետևեք մեզ տելեգրամում
