Ֆրանսիան որոշել է սկսել Հայաստանին ռազմական սպառազինություն մատակարարել: Նման տեղեկություն է հայտնել իսրայելական «i24news»-ը՝ հղում կատարելով Ուկրաինայի պաշտպանության նախարարության Գլխավոր հետախուզական վարչության աղբյուրներին:
Բացի այս՝ լրատվամիջոցը, հղում անելով «AZfront» տելեգրամյան ալիքին, նշում է, որ մոտ ապագայում Հայաստան կժամանի 50 զրահափոխադրիչների առաջին խմբաքանակը։ Նշվել է, որ ուկրաինական գաղտնի ծառայությունները վերահսկում են իրավիճակը հայ-ադրբեջանական հակամարտության գոտում 2022 թվականի կեսերից:
Ընդգծվել է, որ Կիևը մտավախություն ունի, որ Հայաստանին մատակարարվող արևմտյան ռազմական տեխնիկան կարող է օգտագործվել ռուսների կողմից: Ըստ i24news-ի՝ դրա հավանականությունը չափազանց մեծ է, եթե հաշվի առնվի Երևանի և Մոսկվայի միջև սերտ ռազմական համագործակցությունը, այդ թվում՝ երկու ռուսական ռազմաբազաների առկայությունը երկրում։
Լրատվամիջոցի համոզմամբ՝ Ֆրանսիայի և Հայաստանի միջև ուղղակի ռազմական համագործակցություն սկսելու որոշումը կայացվել է 2022 թվականի սեպտեմբերին ՀՀ պաշտպանության նախարար Սուրեն Պապիկյանի Փարիզ կատարած այցի ժամանակ:
«[Ֆրանսիայի] նախագահ Է. Մակրոնի հայամետ հռետորաբանությունը կարող է հանգեցնել հակաօդային պաշտպանության վերաբերյալ համաձայնության»,- գրել է i24news-ը՝ հղում կատարելով միջազգային անվտանգության ամերիկյան վերլուծական գործակալությանը:
Հետևեք մեզ տելեգրամում
