Հայաստանի և Ադրբեջանի, ինչպես նաև Հայաստանի և Թուրքիայի միջև հարաբերությունների կարգավորման և սահմանների բացման դեպքում Հայաստանը լիովին դուրս կգա Իրանի ուղեծրից: Նման տեսակետ է հայտնել Կովկասի հարցերով իրանցի փորձագետ Մոհամմադ Ռեզա Դամավանդին՝ ISNA-ի հետ զրույցում:
Ըստ փորձագետի՝ նման սցենարը Իրանի համար տնտեսական և մի շարք այլ լուրջ մտահոգություններ կհարուցի:
«Այս զարգացումները երկարաժամկետ հեռանկարում չեն ապահովում Իրանի շահերը և նույնիսկ վնասում են։ Եթե նայենք Թուրքիայի նոր կառավարությանը, լինի դա արտաքին գործերի նախարարությունը, թե այլ գերատեսչություններ, ապա նրանք բոլորն էլ Իրանի նկատմամբ լայն առճակատման մոտեցում ունեն։ Եվ այս համատեքստում Հայաստանն ու Ադրբեջանը տվյալ փազլի մի մասն են կազմում»,- նշել է Դամավանդին:
Նա նաև հավելել է, որ նախանշաններն արդեն տեսանելի են, իսկ «Զանգեզուրի միջանցքը» ինքնին Իրանի համար սպառնալիքի ամենաբարձր մակարդակն է։
Հետևեք մեզ տելեգրամում
