Տարածաշրջանային հարցերով փորձագետ Արմեն Պետրոսյանը, Թուրքիայի նախագահի վերջին հայտարարությունները հաշվի առնելով, տարածաշրջանային նոր սցենարների շուրջ որոշակի կանխատեսումների հիմք է նկատում:
Ըստ նրա՝ Թուրքիա-Ադրբեջան հարաբերություններում որոշակի դերաբաշխում կա տարածաշրջանային խնդիրների հետ կապված:
Մասնավորապես, Հայաստանի դիրքորոշման վրա ազդելու գործառույթը դրված է Ադրբեջանի վրա, որն այդ ուղղությամբ գործելու է առանց միջոցների միջև խտրականություն կիրառելու։ Իսկ արտաքին խաղացողների՝ Իրանի, Արևմուտքի հետ երկխոսությունը վերապահվելու է Թուրքիային։
Վերոնշյաի համատեքստում փորձագետը հիշեցրել է Թուրքիայի նախագահի հայտարարությունը՝ Սյունիքով Ադրբեջան-Նախիջևան կապուղու վերաբերյալ:
«Դա Հայաստանի հետ կապված հարց չէ։ Զանգեզուրի միջանցքն Իրանի հետ կապված հարց է»,- Էրդողանի խոսքերը մեջբերել է Պետրոսյանը:
Բացի այդ, փորձագետը նկատել է, որ Էրդողանը դրական ուղերձներ էր հղել Հայաստանի վարչապետի հասցեին՝ իր երդմնակալության արարողությանը մասնակցելու, ինչպես նաև Ադրբեջանի տարածքային ամբողջականությունը ճանաչելու հետ կապված։
Կանխատեսելի է, որ առաջիկայում, ակտիվ և հանգուցային զարգացումներ են լինելու ինչպես դիվանագիտական, այնպես էլ այլ ուղղություններով։
Հետևեք մեզ տելեգրամում
