Թուրքիան դատապարտել է ԱՄՆ-ի և Կիպրոսի հունական վարչակազմի միջև ստորագրված պայմանագիրը, որը վերաբերում է ռազմական համագործակցության տարբեր ոլորտներին։
Թուրքիայի արտաքին գործերի նախարարությունը հայտարարություն է տարածել, որում նշվում է, որ այս քայլը կվնասի խաղաղության և կայունության հաստատման ջանքերին Կիպրոս կղզում:
«Մենք դատապարտում ենք ԱՄՆ-ի և Հարավային Կիպրոսի հունական վարչակազմի միջև պաշտպանության ոլորտում համագործակցության զարգացման ճանապարհային քարտեզի ստորագրումը: Այս քայլը հակասում է Կիպրոսի հարցի լուծման սկզբունքներին»,- ասված է հայտարարության մեջ։
Պաշտոնական Անկարան ԱՄՆ-ին և միջազգային հանրությանը կոչ է արել հավասար վերաբերմունք ցուցաբերել Կիպրոսի թուրքական և հունական համայնքների։
Հիշեցնենք, որ 1974թ. Թուրքիան ներխուժել և օկուպացրել է Կիպրոսի հյուսիսային մասը, ինչի հետևանքով կղզին բաժանվել է հյուսիսային թուրքական և հարավային հունական մասերի:
Թուրքիան միակ երկիրն է, որ ճանաչում է իր կողմից ստեղծված ինքնահռչակ Հյուսիսային Կիպրոսի թուրքական հանրապետությունը։ Իսկ միջազգային հանրությունը դա համարում է օկուպացված տարածք:
Հետևեք մեզ տելեգրամում
