Արդեն երրորդ տարին անընդմեջ Միավորված ազգերի կազմակերպության Կլիմայի փոփոխության գագաթնաժողովը անցկացվում է բռնատիրական պետությունում, որը խստորեն սահմանափակում է խոսքի ազատությունը և իր քաղաքացիների խաղաղ հավաքները։
Այս մասին նշված է Human Rights Watch իրավապաշտպան կազմակերպության հրապարակած հոդվածում՝ հիշեցնելով, որ հերթական գագաթնաժողովը տեղի է ունենալու 2024 թվականի նոյեմբերի 11-ից 22-ն՝ Ադրբեջանի մայրաքաղաք Բաքվում։
Հոդվածում ընդգծվում է, որ կառավարությունները, որոնք մասնակցում են ՄԱԿ-ի Կլիմայի փոփոխության 29-րդ ամենամյա գագաթնաժողովին (COP29), պետք է կատարեն մարդու իրավունքների պաշտպանության իրենց պարտավորությունները, ինչը նաև ներառում է հանածո վառելիքից հեռացում՝ արդարացի, ժամանակային և իրավունքները հարգող եղանակով:
«Սա երրորդ տարին անընդմեջ է, որ ՄԱԿ-ի Կլիմայի փոփոխության գագաթնաժողովը տեղի է ունենում բռնատիրական պետությունում, որը խստորեն սահմանափակում է խոսքի ազատությունը և խաղաղ հավաքները», – նշել է Human Rights Watch-ի բնապահպանական ավագ փաստաբան Միրտո Տիլիանակին՝ հավելելով, որ Ադրբեջանում COP29-ին մասնակցող կառավարությունները պետք է պատրաստ լինեն հստակ ուղերձ հղել, որ կլիմայական արդար և հավակնոտ գործողությունները պահանջում են անկախ ձայների նշանակալի մասնակցություն:
Human Rights Watch-ը նաև ընդգծել է, որ Ադրբեջանն ունի ավտորիտար իշխանություն, որը չի հանդուրժում այլախոհությունը և վերջին ամիսներին ճնշում է անկախ լրագրողներին և քաղաքացիական ակտիվիստներին: Կամայականորեն ձերբակալվածների թվում է մի ակտիվիստը, որը զբաղվում է կոռուպցիայի դեմ պայքարով, քննադատում է Ադրբեջանի նավթի և գազի հատվածը և մարդու իրավունքների պաշտպան է։
«Անկախ ակտիվիզմի նկատմամբ Ադրբեջանի կառավարության թշնամանքը մտահոգություն է առաջացնում այն մասին, թե արդյոք քաղաքացիական հասարակության խմբերը կկարողանան նշանակալի մասնակցություն ունենալ COP29-ին, և որքանո՞վ Ադրբեջանում բնապահպանական ակտիվություն տեղի կունենա համաժողովից հետո», – նշված է Human Rights Watch-ի հրապարակման մեջ:
Վերջինիս փոխանցմամբ՝ 2022 թվականին Ադրբեջանի պետական բյուջեի 52 տոկոսը և արտահանումից ստացված եկամուտների մոտ 90 տոկոսը կազմել են նավթից և գազից ստացված եկամուտները։
Human Rights Watch-ը հիշեցրել է, որ ապրիլին կայացած բարձր մակարդակի հանդիպման ժամանակ՝ Ադրբեջանի նախագահ Իլհամ Ալիևը հայտարարել է գազի արդյունահանումը ընդլայնելու պլանների մասին՝ հիմնականում ի պատասխան Եվրամիության շուկայի պահանջների:
«Կառավարությունները չպետք է Ադրբեջանին թույլ տան օգտագործել իր դիրքը որպես COP29 հյուրընկալող՝ շարունակել հանածո վառելիքի ընդլայնումը և խաթարել կլիմայական ճգնաժամին դիմակայելու ու մարդու իրավունքները պաշտպանելու ջանքերը», – ասել է Տիլիանակին:
Հետևեք մեզ տելեգրամում
