ՑԱՀԱԼ-ը սպասում է Իրանի հնարավոր հարձակմանը

Իսրայելի պաշտպանության բանակը (ՑԱՀԱԼ) բարձրացրել է պատրաստվածության մակարդակը՝ Իրանի հնարավոր պատասխանի ակնկալիքով։ Այս մասին հայտնում է The Jerusalem Post թերթը՝ հղում անելով ռազմական աղբյուրներին։

Թերթի տվյալներով, իրավիճակի գնահատման նպատակով բանակի բոլոր ստորաբաժանումներում և Իսրայելի պաշտպանության բանակի գլխավոր շտաբում անցկացվում են ամենօրյա հանդիպումներ, իսկ Իսրայելի օդուժը և հակաօդային պաշտպանության համակարգերը բարձրացրել են մարտական պատրաստականության մակարդակը։

Պարբերականը, հղում անելով անվտանգության պաշտոնյաներին, հայտնում է, որ Թեհրանը դեռ դիտարկում է իր պատասխանի տարբերակներն ու մասշտաբները, և իսրայելցի զինվորականները չեն բացառում իրանական պատասխանի հնարավորությունը Սիրիայից, Եմենից կամ Իրաքից։