Թուրքիայի նախագահ Ռեջեփ Թայիփ Էրդողանը հայտարարել է, որ ներկա փուլում Թյուրքական պետությունների կազմակերպությունը (ԹՊԿ-TDT) չի նախատեսում ստեղծել միացյալ զինված ուժեր։ Այս մասին նա լրագրողներին ասել է իր Ղրղզստան և Հունգարիա կատարած այցերից հետո։
«Այս փուլում չափազանց վաղ է խոսել այս մասին: Այժմ նման ծրագրեր չկան: Կազմակերպության պետությունների միջև չկան նախաձեռնություններ կամ ջանքեր՝ ապագայում համատեղ զինված ուժեր ստեղծելու համար։ ԹՊԿ-ի շրջանակներում ստորագրված քաղաքացիական պաշտպանության մեխանիզմի մասին համաձայնագիրը կարևոր քայլ է մեր տարածաշրջանում անվտանգության ոլորտում համագործակցության ընդլայնման ուղղությամբ։ Այն կուժեղացնի համակարգումը և կամրապնդի մեր երկրների արձագանքը բնական աղետներին և արտակարգ իրավիճակներին: Այս համաձայնագրի հիմնական նպատակն է ամրապնդել համերաշխությունը ԹՊԿ-ի անդամների միջև արտակարգ իրավիճակների դեմ պայքարում»,-ասել է Էրդողանը՝ հիշեցնելով նաև, որ ԹՊԿ-ի շրջանակներում քննարկվում են նաև «կրթության և տեխնոլոգիաների փոխանցման ոլորտում համագործակցության հարցեր»։
Հետևեք մեզ տելեգրամում
